ग्यालेक्सी एस२५को बलियो बिक्रीसँगै सामसङको कीर्तिमानी त्रैमासिक

काठमाडौं ।

सामसङले सन् २०२५ को पहिलो त्रैमासिकको आफ्नो आम्दानी प्रतिवेदन सार्वजनिक गरेको छ। ग्यालेक्सी एस२५को बलियो बिक्रीले कम्पनीलाई अहिलेसम्मकै कीर्तिमानी त्रैमासिकमा पुर्याएको रिपोर्टले खुलासा गरेको छ।

यस वर्षको पहिलो त्रैमासिक (जनवरी–मार्च अवधि) मा कम्पनीले ७९.१४ ट्रिलियन दक्षिण कोरियाली वोन (५५.७ बिलियन अमेरिकी डलर) को आम्दानी गरेको छ जुन वर्षिक दरमा १० प्रतिशतले वृद्धि भएको उल्लेख गरिएको छ। त्यसैगरी सञ्चालन नाफा ६.७ ट्रिलियन दक्षिण कोरियाली वोन (४.७ बिलियन अमेरिकी डलर) पुगेको छ जुन गत वर्षको सोही अवधिको तुलनामा लगभग १.५ प्रतिशत बढी भएको बताइएको छ।

सामसङ एमएक्स (मोबाइल एक्सपिरियन्स) डिभिजनले ३७ ट्रिलियन दक्षिण कोरियाली वोन (२६ बिलियन अमेरिकी डलर) आम्दानी र ४.३ ट्रिलियन दक्षिण कोरियाली वोन (३ बिलियन अमेरिकी डलर) नाफा उत्पन्न गरेको छ। उन्नत ग्यालेक्सी एआई एक्सपिरियन्सको माग, साथै “बढाइएको लागत क्षमता” र केही कम्पोनेन्टहरूको मूल्य गिरावटले यो प्रदर्शनलाई बढाएको उल्लेख गरिएको छ।

सामसङले अर्को त्रैमासिकमा बलियो फ्ल्यागशिप बिक्री कायम राख्ने लक्ष्य राखेको छ। ग्यालेक्सी एस२५ एज मे महिनाको १३ तारिखमा कोरियामा र मे महिनाको ३० तारिखमा अन्तर्राष्ट्रिय स्तरमा लन्च हुने बताइएको छ। साथै कम्पनीले “अद्भुत बुद्धिमत्ता” मार्फत ग्यालेक्सी ए सिरिजमा आफ्नो एआई लाइनअप विस्तार गर्ने कुरा पनि पुष्टि गरेको छ।

सेमिकण्डक्टर र मेमोरी चिप्सको लागि जिम्मेवार डीएस डिभिजनले कुल २५.१ ट्रिलियन दक्षिण कोरियाली वोन(१७.६ बिलियन अमेरिकी डलर) को साथ आम्दानीको अर्को प्रमुख हिस्सा ओगटेको छ। औसत बिक्री मूल्यमा गिरावट र एआई चिप्समा निर्यात नियन्त्रणका कारण एचबीएम बिक्रीमा कमीले समग्र आम्दानी प्रभावित भएको छ।

सामसङले बढ्दो समष्टिगत आर्थिक अनिश्चितता र विश्वव्यापी व्यापार तनावको बीचमा भविष्यको प्रदर्शनको अनुमान गर्न गाह्रो भएको बताएको छ। आर्थिक वृद्धि सुस्त भइरहेको छ, र यदि यी अनिश्चितताहरू घटे भने, सन् २०२५ को दोस्रो भागमा कोरियाली कम्पनीको प्रदर्शनमा सुधार हुनेछ भनि जीएसएमएरिनाले उल्लेख गरेको छ।