ओपनएआईले च्याटजीपीटी सर्च अपडेटसँगै सार्वजनिक गर्यो नयाँ शपिङ फिचरहरु

काठमाडौं ।

च्याटजीपीटीको वेब सर्च क्षमता अपडेट गरेको ओपनएआईले सोमबार घोषणा गरेको छ। जसले अनलाइन किनमेललाई अझ सहज र व्यक्तिगत बनाउनेछ। यो सुविधाले प्रयोगकर्तालाई उनीहरूको आवश्यकताअनुसार उत्पादन सिफारिस गर्नेछ — त्यहाँ तस्वीरहरू, समीक्षाहरू र सिधै किनमेल गर्न लिंकहरू पनि हुनेछन्।

कम्पनीका अनुसार यो जेनेरेटिभ एआई टुलको सर्च फिचर गत वर्षदेखि लोकप्रिय बन्दै गएको छ, र पछिल्लो सातामा मात्र १ अर्बभन्दा धेरै वेब सर्च भएको छ।

रोयटर्सका अनुसार नयाँ अपडेट जीपीटी-४ओ मा आधारित छ र प्रो, प्लस, फ्री स्तरका साथै लगइन नगरी प्रयोग गर्नेहरूलाई समेतच्याटजीपीटीका सबै प्रयोगकर्ताहरूका लागि विश्वभर उपलब्ध हुनेछ।

फेसन, सौन्दर्य, घरायसी सामग्री र इलेक्ट्रोनिक्स जस्ता विधाहरूमा प्रयोगकर्ताले यदि विशिष्ट प्रश्न सोध्छन् भने, उनीहरूलाई व्यक्तिगत रूपमा अनुकूल उत्पादन सिफारिस प्राप्त हुनेछ।

ओपनएआईले भन्यो, ‘यो सेवा विज्ञापनरहित हुनेछ र च्याटजीपीटी प्लेटफर्ममार्फत गरिएका खरिदहरूबाट कम्पनीले कुनै कमीशन लिने छैन।’ शपिङ नतिजाहरू स्वतन्त्र रूपमा निर्धारण हुनेछन् र मूल्य, उत्पादन विवरण र समीक्षाजस्ता संरचित मेटाडाटामा आधारित हुनेछन्, जुन तेस्रो पक्ष स्रोतहरूबाट लिइनेछ।

यो कदम गुगलको मातृ कम्पनी अल्फाबेटको खोज क्षेत्रमा वर्चस्वलाई चुनौती दिने उद्देश्यले उठाइएको हो, जहाँ गुगलले विज्ञापनमा जोड दिँदै आएको छ। फेब्रुअरीमा ओपनएआईको साप्ताहिक सक्रिय प्रयोगकर्ताको संख्या ४० करोड नाघेको कम्पनीका प्रवक्ताले रोयटर्सलाई बताएका थिए।