दुर्घटना रोक्न ‘राडार गन’ प्रयोग

काठमाडौं ।

मुस्ताङमा सडक सञ्जालबाट घुम्न आउने पर्यटकको चाप बढेसँगै सवारीसाधनको गति मापन गर्ने यन्त्र (राडार गन) प्रयोगमा ल्याइएको छ। सडक विभागले जिल्ला प्रहरी कार्यालयलाई दुई वटा राडार गन उपलब्ध गराएको छ।

जिल्ला ट्राफिक प्रहरी कार्यालय मुस्ताङले शुक्रबार पहिलो पटक घरपझोङ गाउँपालिका-४, जोमसोममा पहिलो पटक उक्त यन्त्रको परोक्षणमा ल्याएको जिल्ला प्रहरी कार्यालय मुस्ताङका प्रहरी निरीक्षक विशाल अधिकारीले बताए। सूचना अधिकारीसमेत रहनुभएका अधिकारी भन्छन्, “अब नियमित प्रयोगमा आउँछ, पहिलो पटक सचेत र अटेर गरे जरिबाना हुन्छ।”

सवारीसाधनको प्रयोग गरी मुस्ताङ घुम्न आउने स्वदेशी तथा विदेशी पर्यटकको चाप बढ्न थालेपछि राडार गन र मापसे जाँच ब्रेथलाइजरको समेत प्रयोग गरिएको जिल्ला ट्राफिक कार्यालय मुस्ताङका प्रमुख भुवन क्षेत्रीले बताए। प्रतिघण्टा ४० किमी र घुम्ती र बजार क्षेत्रमा ३० किमी चलाउन पाइने प्रमुख क्षेत्रीले जानकारी दिए।

राडार गनबाट टाढाको दुरीमा गुडेको सवारीसाधन गति क्यामरामा अङ्क देखाउँछ र तस्बिर पनि खिच्ने भएकाले तत्काल प्रमाणसहितको चालकलाई देखाइने छ। मेसिनकै सहायताले ओभर स्पिडका त्यस्ता सवारीसाधन रोकेर सचेत गराउने र सवारीसाधनको नम्बर टिपोट राखिने छ।

सवारीचालकलाई सचेत बनाउन सडक विभागसँगको समन्वयमा घाँसादेखि जोसमोमसम्म पहिलो चरणमा पाँच स्थानमा होर्डिङ बोर्ड र ट्राफिक चिह्नसमेत राखिएका छन्। मादक पदार्थ सेवन (मापसे) गरी सवारी चलाउँदा दुर्घटना बढ्दै जान थालेपछि प्रहरीले म्याग्दीको सिमानासँग जोडिएको थासाङ गाउँपालिका-४, घाँसादेखि नै जाँच गर्ने जिल्ला ट्राफिक कार्यालय मुस्ताङले जनाएको छ।

मुस्ताङ प्रवेश र बाहिरिने सवारीसाधनका नालकलाई पहिलो पटक राडार गन र ब्रेथलाइजरको प्रयोग भइरहेको जानकारी सवारीचालकसँग एक मिनेट र यात्रुसँग दुई मिनेट कार्यक्रम अन्तर्गत जानकारी गराइने छ। एक हप्ताको परीक्षणपछि सडक मापदण्डविपरीत सवारी चलाउनेलाई कारबाही गरिने प्रहरीले बताएको छ।

आजको गोरखापत्रबाट