च्याटजीपीटीले केवल एउटा फोटोमार्फत तपाईं कहाँ बस्नुहुन्छ भनेर पत्ता लगाउन सक्ने, खतरनाक हुनसक्ने चेतावनी

काठमाडौं ।

धेरै मानिसहरूले आफ्ना तस्बिरहरूबाट एक्सन फिगरहरू बनाउन च्याटजीपीटी प्रयोग गरेको चरण बितिसकेपछि, इन्टरनेटमा अब लोकेशन ट्र्याकिङ गर्ने नयाँ प्रवृत्ति आएको छ।

सुरुमा त, यो खेल जस्तो लाग्न सक्छ। प्रयोगकर्ताहरूले रेस्टुरेन्टको मेनु, सेल्फी वा स्ट्रिट भ्यू (सडकको दृश्यहरू) को फोटोहरू अपलोड गर्छन्, र च्याटजीपीटीले फोटो कहाँ लिइएको हो भनेर पत्ता लगाउने प्रयास गर्दछ। केही प्रयोगकर्ताहरूले भने च्याटजीपीटीलाई गुगल स्ट्रिट भ्यूका तस्बिरहरूको आधारमा स्थान अनुमान गर्नुपर्ने एक लोकप्रिय अनलाइन खेल जियोगेसरको रुपमा बदल्ने उल्लेख गरिएको छ।

यो हानिरहित लाग्न सक्छ, तर यसको गम्भीर “नकारात्मक पक्ष” पनि रहेको बताइएको छ। ओपनएआईले हालसालै आफ्नो नयाँ ओ३ र ओ४–मिनी मोडेलहरू जारी गरेको छ जसमा उन्नत “भिजुअल रिजनिङ” क्षमताहरू उपलब्ध छन्। यसको मतलब एआईले उपयोगी जानकारी निकाल्नको लागि धमिलो तस्बिरहरू पनि जुम, रोटेट, क्रप गर्न र विश्लेषण गर्न सक्नेछ। जब यी क्षमताहरू मोडेलको अन्य क्षमताहरूसँग जोडिन्छन् तब परिणामको रुपमा स्थानहरू पहिचान गर्ने अविश्वसनीय क्षमता देखा पर्ने टेक स्पटले रिपोर्ट गरेको छ।

ट्रान्सलेसन (अनुवाद): यसका लागि केवल एउटा साधारण इन्स्टाग्राम फोटो मात्र चाहिने र एआईले तपाईं कुन शहरमा हुनुहुन्छ, कुन छिमेकमा हुनुहुन्छ भन्ने सहितका तपाईंको सही ठेगाना पनि बताउन सक्ने उल्लेख गरिएको को छ। यसले डक्सिङ जस्ता, कसैको सहमति बिना उनिहरुको स्थान वा पहिचानको खुलासा गर्ने जस्ता गम्भीर जोखिमहरूको लागि ढोका खोल्दछ।

एउटा परीक्षणमा, ओ३ मोडेलले बारमा रहेको बैजनी रङ्गको गैंडाको टाउकोको तस्बिर न्यु योर्कको विलियम्सबर्गको बारमा खिचिएको हो भनेर बताउन सक्षम भएको बताइएको छ भने जीपीटी–४ओ ले गलत रूपमा त्यो ब्रिटिश पब हो भनि सोचेको उल्लेख गरिएको छ। केही अवस्थामा ओ३ बढी सटीक भए पनि, यो त्रुटिरहित नभएको र यो कहिलेकाहीं स्थान निर्धारण गर्ने प्रयासमा अड्किने गरेको बताइएको छ।

ओपनएआईले यी क्षमताहरूले अपाङ्गता भएका व्यक्तिहरूको पहुँच र वैज्ञानिक अनुसन्धानदेखि आपतकालीन प्रतिक्रियासम्मका क्षेत्रहरूमा मद्दत गर्न सक्छ भनि बताएको छ। साथै मोडेलहरूले निजी वा संवेदनशील जानकारीको लागि अनुरोधहरू अस्वीकार गर्ने र तस्बिरहरूमा निजी व्यक्तिहरू पहिचान गर्ने विरुद्धका सुरक्षा उपायहरू पनि रहेको ओपनएआईले दाबी गरेको छ।

विशेष गरी कसैलाई हानि पुर्याउन चाहनेहरूको लागि साना विवरणहरू (संकेतहरू, इन्टेरियोर्स, सिनेरी) मा आधारित तस्बिरबाट स्थान अनुमान गर्ने एआईको क्षमता अझै पनि सम्भावित रूपमा खतरनाक रहने टेलीग्राफले उल्लेख गरेको छ।