ओपनएआईले जीपीटी-४ एआई मोडल च्याटजीपीटीबाट हटाउने

काठमाडौं ।

ओपनएआईले दुई वर्षअघि सार्वजनिक गरेको जीपीटी-४ नामक एआई मोडेललाई च्याटजीपीटी बाट चाँडै हटाउने भएको छ। बिहीबार प्रकाशित एक चेन्जलगअनुसार, अप्रिल ३० देखि जीपीटी-४ लाई पूर्ण रूपमा हालको डिफल्ट मोडेल जीपीटी-४ओ ले प्रतिस्थापन गर्नेछ।

जीपीटी-४ को प्रयोग भने ओपनएआईको एपीआई मार्फत जारी रहनेछ। “सिधा तुलना गर्दा, जीपीटी-४ओ ले लेखन, कोडिङ, स्टेम लगायतका क्षेत्रमा जीपीटी-४ लाई लगातार उछिन्ने देखिएको छ,” ओपनएआई ले चेन्जलगमा लेखेको छ। “हालैका सुधारहरूले जीपीटी-४ओ को निर्देशन पालना, समस्या समाधान र संवाद क्षमतामा थप सुधार ल्याएका छन्, जसका कारण यो जीपीटी-४ को स्वाभाविक उत्तराधिकारी बनेको हो।”

टेकक्रञ्चका अनुसार जीपीटी-४ मार्च २०२३ मा च्याटजीपीटी र माइक्रोसफ्टको वेबमा आधारित कोपाइलट च्याटबोटका लागि सार्वजनिक गरिएको थियो। यसको केही संस्करणमा मल्टिमोडल क्षमता थियो, जसले यसलाई पाठसँगै तस्बिर बुझ्न पनि सक्षम बनाएको थियो — ओपनएआई को पहिलो व्यापक रूपमा प्रयोगमा आएको यस्तो मोडेल।

ओपनएआईका सीईओ साम अल्टम्यानका अनुसार जीपीटी-४ को प्रशिक्षणमा १० करोड डलरभन्दा बढी खर्च भएको थियो। यो मोडेललाई नोभेम्बर २०२३ मा सार्वजनिक गरिएको छिटो र सस्तो संस्करण जीपीटी-४ टर्बोले प्रतिस्थापन गरेको थियो।