ओपनएआईले अमेरिका र क्यानाडामा कलेज पढ्ने विद्यार्थीलाई च्याटजीपीटी प्लस निःशुल्क उपलब्ध गराउने

काठमाडौं ।

ओपनएआईले कलेजमा अध्ययनरत विद्यार्थीहरूका लागि राम्रो खबर ल्याएको छ। उनीहरूले मे २०२५ को अन्त्यसम्म च्याटजीपीटी प्लस निःशुल्क प्रयोग गर्न पाउने भएका छन्। हालै एक्समा सार्वजनिक गरिएको यो प्रस्ताव केवल अमेरिका र क्यानडामा अध्ययनरत विद्यार्थीहरूका लागि मात्र उपलब्ध हुनेछ।

सामान्य रूपमा च्याटजीपीटी प्लसको सदस्यता शुल्क प्रति महिना २० डलर पर्छ। तर योग्य विद्यार्थीहरूले ओपनएआईका गहन अनुसन्धान मोडेलहरू, विभिन्न तर्क क्षमताहरू र सोरा भिडियो जेनेरेसन सुविधा (सीमित रूपमा) निःशुल्क प्रयोग गर्न पाउने न्युज१८ ले उल्लेख गरेको छ।

ओपनएआईका सीईओ साम अल्टम्यानले एक्समा लेखेका छन्, “च्याटजीपीटी प्लस मेसम्म अमेरिका र क्यानडाका कलेज विद्यार्थीहरूका लागि निःशुल्क छ!”

यो कम्पनीको सीमित समयको प्रोमोशन हो, जसअन्तर्गत जीपीटी-४ओ, चित्र उत्पादन सुविधा, उन्नत आवाज मोड, र अनुसन्धान उपकरणहरू (जो सामान्यतया भुक्तानी गरिसकेका प्रयोगकर्ताका लागि मात्र उपलब्ध हुन्छन्) पनि उपलब्ध गराइनेछ।

फोर्ब्सको रिपोर्ट अनुसार च्याटजीपीटीका सबैभन्दा सक्रिय प्रयोगकर्ता समूहमध्ये कलेज विद्यार्थीहरू पनि एक हुन्। १८ देखि २४ वर्षका एकतिहाइ अमेरिकीहरूले यस प्लेटफर्म प्रयोग गरिरहेको र तिनीहरूको करिब २५ प्रतिशत प्रश्नहरू शैक्षिक कार्यसँग सम्बन्धित हुने देखिएको छ। यसले विद्यार्थीहरूले नयाँ तरिकाले सिक्ने, दोहोर्‍याउने र विचारहरू अन्वेषण गर्ने बानी बनाइरहेको संकेत गर्छ।