ताइवानी कम्पनी फक्सकनले ईभीका क्षेत्रमा जापानी अटो निर्माता निसानसँग सहकार्य गर्ने

काठमाडौं ।

ताइवानी कम्पनी फक्सकनले जापानी अटो निर्माता निसानसँग सहकार्य गर्न चाहेको बताएको छ। तर हालको अवस्थामा दुबै कम्पनीबीच कुनै औपचारिक छलफल जारी छैन।

फक्सकनको इलेक्ट्रिक सवारी (ईभी) विभागका प्रमुख रणनीति अधिकृत जुन सेकीले निक्केई पत्रिकालाई बुधबार प्रकाशित अन्तर्वार्तामा यो कुरा बताएका हुन्।

यसअघि निसानका वरिष्ठ कार्यकारी समेत रहेका सेकीले बुधबार टोकियोमा आयोजना हुने एक सेमिनारको पूर्वसन्ध्यामा यस्तो बताएका हुन्। सो सेमिनारमा फक्सकन ले जापानी कम्पनीहरूलाई लक्षित गर्दै आफ्नो ईभी रणनीति सार्वजनिक गर्ने लक्ष्य राखेको छ।

“हाम्रो दृष्टिकोणमा, जापानी अटो कम्पनीहरूसँग, विशेषगरी निसान सँगको मेल मिलाप फक्सकन का लागि बलियो पक्ष बन्न सक्छ,” निक्केईले सेकीलाई उद्धृत गर्दै जनाएको छ।

रोयटर्सका अनुसार सेकीले फक्सकन, होण्डा, निसान र मित्सुबिशी मोटर्सको सम्भावित संयुक्त साझेदारीमा सहभागी हुनु राम्रो विचार भएको पनि बताएका छन्। साथै फक्सकन र मित्सुबिशी बीच ईभी आपूर्ति सम्झौता अन्तिम चरणमा पुगेको पुष्टि गरेका छन्।

निसानको कनिष्ठ साझेदार मित्सुबिशीले ओसिनिया क्षेत्रको बजारका लागि इलेक्ट्रिक सवारी उत्पादन फक्सकन मार्फत गर्ने योजना बनाइरहेको छ। फक्सकनले एप्पलका लागि आइफोन तथा एनभिडियाका लागि कृत्रिम बुद्धिमत्ता सर्भर उत्पादन गर्दै आएको छ।

फेब्रुअरीमा निक्केईले फक्सकनले होण्डा सँग साझेदारी प्रस्ताव गरेको र त्यसको अन्तिम लक्ष्य होण्डा, निसान र मित्सुबिशी सहितको चार पक्षीय सहकार्य खडा गर्नु रहेको जानकारी दिएको थियो। यसअघि होण्डा–निसान गाभ्ने प्रयास असफल भएको थियो।

फक्सकनले यसअघि निसानमा लगानी गर्ने विषयमा विचार गर्नसक्ने बताएको थियो, तर कम्पनीको मुख्य लक्ष्य सहकार्य नै भएको स्पष्ट पारेको थियो।