सामसङ एसडीआईले यसकारण १४ प्रतिशत घटाउँदैछ आफ्नो शेयर मूल्य

काठमाडौं ।

दक्षिण कोरियाली ब्याट्री निर्माता कम्पनी सामसङ एसडीआईले नयाँ सेयरको मूल्य १४ प्रतिशतले घटाउने घोषणा गरेको छ। कम्पनीले २ ट्रिलियन वोन (करिब १.४ अर्ब डलर) संकलन गर्न नयाँ सेयर बिक्री गर्दैछ।

अमेरिकी ट्यारिफ सम्बन्धी चिन्ताका कारण विश्व बजारमा आएको गिरावटले एसियाली क्षेत्रका कम्पनीहरूका डिलहरूमा असर पारेको छ।

सामसङ एसडीआई ले बुधबार जनाएको अनुसार कम्पनीले नयाँ सेयर १,४६,२०० कोरियन वोन (९८.४१ डलर) प्रति सेयरको दरमा बिक्री गर्नेछ, जुन अघिल्लो महिना घोषणा गरिएको १,६९,२०० वोनको तुलनामा कम हो। अन्तिम मूल्य मे १९ मा तय गरिनेछ।

रोयटर्सका अनुसार अमेरिकी राष्ट्रपति डोनाल्ड ट्रम्पको ट्यारिफ प्याकेजको प्रभाव स्वरूप विश्व बजारमा आएको अस्थिरताका कारण बढ्दो संख्यामा डिलहरू प्रभावित भइरहेका छन्।

बुधबारदेखि चीनसहित दर्जनौं देशहरूमा १०४ प्रतिशतसम्मका शुल्क लागू भएका छन्। चीनले मंगलबार ती प्रस्तावित ट्यारिफहरू विरुद्ध अन्तिमसम्म लड्ने चेतावनी दिएको थियो।

यी ट्यारिफहरूको प्रभावले विश्वभर सेयर र बन्ड बजारमा अस्थिरता ल्याएको छ, र लगानीकर्ताहरूले सम्भावित विश्वव्यापी आर्थिक मन्दीको डर व्यक्त गरेका छन्।

बुधबार एसियाली सेयर बजार पुनः घटेको छ। जापान बाहेकका एशिया-प्यासिफिक सेयरहरूको एमएससीआई सूचकांक २ प्रतिशतले घटेको छ। अमेरिकाको १० वर्षे ट्रेजरी प्रतिफल २० आधार अंकले बढेको छ, जसले लगानीकर्ताहरूले सुरक्षित सम्पत्ति पनि बेच्न थालेको संकेत गर्छ।

दक्षिण कोरियाली वोन बुधबार १६ वर्षयताकै न्यूनतम स्तरमा झरेको छ।
सामसङ एसडीआई ले मार्चमा ११,८२१,००० नयाँ सेयर जारी गरेर जनरल मोटर्ससँगको अमेरिकी संयुक्त लगानी र हंगेरीस्थित कारखाना विस्तार लगायतका परियोजनाहरूका लागि पूँजी जुटाउने योजना सार्वजनिक गरेको थियो।

बजारमा आएको अस्थिरताको कारण एशियाका अन्य कम्पनीहरू पनि आफ्ना लगानी योजनामा परिवर्तन गरिरहेका छन्। सनटोरी होल्डिङ्स, असाही र निसिनजस्ता जापानका तीन ठूला कम्पनीहरूले यसै साता १०० अर्ब येन (करिब ६८८.८० मिलियन डलर) बराबरको बन्ड डिल स्थगित गरेका छन्।

एशियाभर सार्वजनिक सेयर निष्कासन (आईपीओ) र बन्ड बिक्रीको भविष्यलाई नजिकबाट हेरिएको छ, किनभने विभिन्न देशहरूमा डिलहरू स्थगित वा रद्द भइरहेका रोयटर्सले उल्लेख गरेको छ।

बर्कशायर ह्याथवेले हाल सात खण्डमा येन-डिनोमिनेटेड बन्ड बिक्रीको तयारी गरिरहेको छ। कम्पनीले लगानीकर्ताहरूबाट बढि प्रतिफलको मागलाई ध्यानमा राख्दै मूल्य निर्देशन ५ आधार अंकले फराकिलो बनाएको छ। डिलको बुकिङ बिहीबार एशियाली समयअनुसार बन्द हुनेछ।

बर्कशायर हैथावेले यो विषयमा टिप्पणी गर्न अस्वीकार गरेको छ।
भारतीय विद्युतीय सवारी निर्माता एथर इनर्जीले अनिश्चित बजार अवस्थाका कारण आफ्नो ४०० मिलियन डलरको आईपीओ ५० मिलियन डलरले घटाउने विचार गरिरहेको ब्लूमबर्गले बुधबार स्रोतहरू उद्धृत गर्दै जनाएको छ।