पुराना डिभाइसहरूमा एण्ड्रोइड १५ अपडेट सुरू गर्दै सामसङ, कुन कुन मोडलले पाउनेछन् अपडेट?

काठमाडौं ।

सामसङले यसै साता देखिनै आफ्ना पुराना ग्यालेक्सी डिभाइसहरूका लागि एण्ड्रोइड १५ अपडेट रोलआउट गर्ने तयारी गरेको छ। कम्पनीले वन यूआई ७ अपडेटको समयरेखा यसअघि नै सार्वजनिक गरिसकेको थियो, र अब त्यो मितिको नजिक पुगेको छ।

न्युज१८ का अनुसार एण्ड्रोइड १५ मा आधारित वन यूआई ७ संस्करण सन् २०२५ को सुरुवातमा ग्यालेक्सी एस२५ सिरिजसँगै पहिलोपटक सार्वजनिक गरिएको थियो।

लामो प्रतीक्षा पछि, कम्पनीले अन्ततः आफ्नो पुराना ग्यालेक्सी डिभाइसहरूमा पनि नयाँ अपडेट दिने तयारी गरेको देखिन्छ।

सामसङ वन यूआई ७ अपडेट: अप्रिल २०२५ मा यी डिभाइसहरूले पाउनेछन् अपडेट

• ग्यालेक्सी एस२४ सिरिज: एस२४, एस२४ प्लस, एस२४ अल्ट्रा
• ग्यालेक्सी एस२४ एफई
• ग्यालेक्सी एस२३ सिरिज: एस२३, एस२३ प्लस, एस२३ अल्ट्रा
• ग्यालेक्सी एस२३ एफई
• ग्यालेक्सी जेड फोल्ड ६ र ग्यालेक्सी जेड फ्लिप ६
• ग्यालेक्सी जेड फोल्ड ५ र जेड फ्लिप ५
• ग्यालेक्सी ट्याब एस१०, एस१० प्लस र एस१० अल्ट्रा
• ग्यालेक्सी ट्याब एस९, एस९ प्लस, एस९ अल्ट्रा

यी सबै डिभाइसहरू करिब एक वर्ष पुराना छन्, जसमा २०२४ मा सार्वजनिक भएका पछिल्ला फोल्डेबल मोडेलहरू पनि समावेश छन्। यद्यपि, कम्पनीसँग ग्यालेक्सी एफ, एम र ए सिरिजका थुप्रै मिड-रेन्ज फोनहरू पनि छन्, जुन सूचीमा समावेश छैनन्, तर तीले आगामी केही महिनाभित्र एण्ड्रोइड १५ अपडेट पाउने सम्भावना छ।