रियलमी १४ फाइभजी स्न्यापड्रागन ६ जेन ४ को साथ अनावरण

काठमाडौं ।

रियलमी १४ फाइभजी अब थाइल्याण्डमा आधिकारिक रुपमा उपलब्ध हुने भएको छ। मोबाइल गेमिङ उत्साहीहरूलाई लक्षित गरिएको यो बजेट फोनको मेका डिजाइन नामक रोचक संस्करण ल्याइएको छ।

रियलमी १४ फाइभजीमा समावेश गरिएको स्न्यापड्रागन ६ जेन ४ चिपसेटलाई १२ जीबी र्याम सँग जोडिएको छ। फोनको अगाडिको भागमा फुल एचडी प्लस रिजोल्युसन र १२० हर्जसम्मको रिफ्रेस रेट भएको ६.६७ इन्चको एएमओएलईडी प्यानल रहेको छ।

रियलमी १४ फाइभजीमा अगाडिको क्यामरामा १६ मेगापिक्सेलको सेन्सर भएको र यसलाई पञ्च होल भित्र राखिएको छ। पछाडिको क्यामरामा भने ५० मेगापिक्सेलको मुख्य क्यामरा र २ मेगापिक्सेलको डेप्थ सेन्सर रहेको छ।

कम्पनीले फ्री फायरसँग साझेदारी गरेको र फोनको ब्याट्रीले १०.५ घण्टासम्म गेम खेल्न सकिने खुलासा गरेको छ।

फोनमा भने ६,००० एमएएच क्षमताको ब्याट्री रहेको छ। यस ब्याट्रीले ४५ वाट वायर्ड चार्जिङ र बाइपास चार्जिङलाई समर्थन गर्दछ। यसको अर्थ प्लग इन गरेर फोन प्रयोग गर्दा, ब्याट्री निरन्तर चार्ज र डिस्चार्ज नहुने तर पावर सिधै तारबाट आउने बताइएको छ।

नयाँ फोन ६,०५० वर्ग मिमी भेपर चेम्बरको साथ ग्रेफाइट सिटसहित आएको छ। यसको हिट (ताप) डिसिपेसन क्षमताहरूले सीपीयूको तापक्रम २० डिग्री सेल्सियसले घटाउन सक्ने बताइएको छ।

यो फोन एन्ड्रोइड १५ मा आधारित रियलमी यूआई ६.० को साथ आएको छ।

रियलमी १४ फाइभजी मेका सिल्भर, स्टर्म टाइटेनियम, र पिंक वारियर गरी तीनओटा रङ्गहरूमा आउने बताइएको छ। फोनको २५६ जीबीको आधार संस्करणको मूल्य ११,९९९ थाईभाट (३५० अमेरिकी डलर) कायम गरिएको छ भने ५१२ जीबी भेरियन्टको मूल्य १३,९९९ थाईभाट (४१५ अमेरिकी डलर) रहेको रिपोर्टमा उल्लेख छ।