रौतहट जिल्लामा अनलाइन नागरिकता सिफारिस सुरु

काठमाडौं ।

रौतहट जिल्लामा नागरिकता अनलाइन सिफारिस दुईओटा पालिकामा मात्र पूर्ण रूपमा कार्यान्वयनमा आएको छ। १६ नगरपालिका र दुई गाउँपालिका रहेको यस जिल्लामा हालसम्म गौर नगरपालिका र गरुडा नगरपालिकाको सबै वडाले नागरिकता अनलाइन सिफारिस सुरु गरेको छ।

जिल्लाको ईशनाथ नगरपालिकाको वडा नं. १ देखि ८ सम्म नागरिकता अनलाइन सिफारिस भए पनि वडा नं. ९ ले हालसम्म कार्यान्वयन गर्न सकेको छैन। नगरपालिकाका प्रमुख प्रशासकीय अधिकृत नन्दकिशोर गुप्ताका अनुसार सो वडामा दुई दिनभित्र अनलाइन नागरिकता सिफारिसको कार्य सुरुवात हुने बताए।

परोहा नगरपालिकाको वडा नं. ३, ४, ६, राजपुर नगरपालिकाको वडा नं. १, ४, ९, देवाही गोनाही नगरपालिकाको वडा नं. ६ तथा गुजरा नगरपालिका वडा नं. ९ ले केन्द्रीकृत नागरिकता सूचना व्यवस्थापन प्रणालीको माध्यमबाट नागरिकता अनलाइन सिफारिस गरी सुरुवात गरेको जिल्ला प्रशासन कार्यालय रौतहटका प्रशासकीय अधिकृत मनिष झाले बताए।

जिल्लाका १८ ओटै स्थानीय तहका १५७ वटा वडाका कर्मचारीलाई अनलाइन प्रणालीबाट नागरिकताको सिफारिस गर्ने प्रक्रियाको विषयमा तालिम दिइएको छ।

चन्द्रपुर नगरपालिका चन्द्रनिगाहपुरले वडामा आवश्यक स्रोतसाधन उपलब्ध गराइसकेको र यो सातादेखि अनलाइन सिफारिस हुने प्रमुख प्रशासकीय अधिकृत किरण निधि तिवारीले बताए।

अनलाइनमार्फत सिफारिस गर्दा नागरिकता सिफारिसमा हुने गलत क्रियाकलाप नियन्त्रण हुने, सेवाग्राहीलाई झन्झट नहुने र कर्मचारीलाई पनि काम गर्न सजिलो भएको प्रमुख जिल्ला अधिकारी विनोदकुमार खड्काले बताए।

प्रमुख जिल्ला अधिकारी खड्काले नागरिकता सिफारिसको कार्यलाई समयसापेक्ष, प्रविधिमैत्री र सेवाग्राहीलाई झन्झटरहित छिटोछरितो सेवा प्रवाह गराउन अनलाइन प्रणालीमार्फत नागरिकताको सिफारिस गर्ने कार्य अत्यावश्यक रहेको बताए।

“यही वैशाख २ गतेदेखि सबै पालिकाका वडाबाट अनलाइनबाटै सिफारिस हुने व्यवस्था मिलाउन निर्देशन दिइसकेका छौँ” प्रअिज खड्काले बताए। उनका अनुसार तत्काललाई नयाँ नागरिकताको मात्र सिफारिसका लागि यो सेवा सुचारु गरिएको छ।

गृह मन्त्रालय अन्तर्गत रहेको नागरिकता तथा राष्ट्रिय परिचयपत्र व्यवस्थापन शाखाका प्रमुख प्रदर्शनी कुमारीले अनलाइन नागरिकता सिफारिस पूर्ण रूपमा कार्यान्वयन भएपछि स्थानीय तह तथा प्रशासन कार्यालय दुवैलाई सहज हुने उल्लेख गरिन्। –गोरखापत्रबाट