शनिबारको समयसीमा अगाडि टिकटकको बिक्री सम्झौता हुनेछः ट्रम्प

काठमाडौं ।

राष्ट्रपति डोनाल्ड ट्रम्पले १७ करोड अमेरिकीहरूले प्रयोग गर्ने सर्ट (छोटो) भिडियो एप टिकटक बिक्री गर्ने सम्झौता यसको चिनियाँ मालिक बाइटडान्ससँग शनिबारको समयसीमा अगाडि नै गरिने बताएका छन्।

टिकटकलाई गैर–चिनियाँ खरिदकर्ता खोज्न अप्रिल ५ सम्मको समयसीमा तोकेको र अन्यथा सुरक्षा कारणले गर्दा २०२४ को कानून अनुसार अमेरिकामा प्रतिबन्ध लगाइने ट्रम्पले बताएको रोयटर्सले रिपोर्ट गरेको छ।

“हामीसँग धेरै सम्भावित खरीदकर्ताहरू छन्” ट्रम्पले आइतबार राति एयर फोर्स वनमा पत्रकारहरूलाई भने।

“टिकटकमा ठूलो चासो छ” भन्दै उनले थप उल्लेख गरे, “म टिकटक जीवित रहेको हेर्न चाहन्छु।”

यस विषयमा परिचित दुई व्यक्तिलाई उदृत गर्दै रिपोर्टमा भनिएअनुसार निजी इक्विटी फर्म ब्ल्याकस्टोनले टिकटकको अमेरिकी सञ्चालनमा सानो अल्पसंख्यक लगानी गर्न मूल्याङ्कन गरिरहेको छ।

ब्ल्याकस्टोनले बाइटडान्सका विद्यमान गैर–चिनियाँ शेयरधारकहरूलाई टिकटकको अमेरिकी व्यवसायको लागि बोली लगाउन नयाँ पूँजी योगदान गर्न सुस्केहाना इन्टरनेशनल ग्रुप र जनरल एट्लान्टिकको नेतृत्वमा सामेल हुने बारे छलफल गरिरहेको छ। साथै यो समूह अग्रपंक्तिमा उभिएको उल्लेख गरिएको छ।

वाशिंगटनले बाइटडान्सको टिकटकको स्वामित्वले यसलाई चिनियाँ सरकारको अधीनमा राखेको बताएको छ र बेइजिङले संयुक्त राज्य अमेरिका विरुद्ध प्रभाव सञ्चालन गर्न र अमेरिकीहरूको डाटा सङ्कलन गर्न एप प्रयोग गर्न सक्ने उल्लेख गरेको छ।

यस अघि ट्रम्पले ‘यदि सामाजिक सञ्जाल एपमा सम्झौता भएन भने उनी अप्रिलको समयसीमा बढाउन इच्छुक’ भएको बताएका थिए।

कुनै पनि सम्झौता सम्पन्न गर्न चीनको भूमिका महत्त्वपूर्ण हुने गत हप्ता उनले स्वीकार गरेका थिए, जसमा चीनको स्वीकृति दिने जस्तो कुरा पनि समावेश रहेको भन्दै उनले सम्झौता सम्पन्न गर्न मद्दत गर्नको लागि शुल्कमा थोरै कटौती वा केही कर घटाउन सक्ने उल्लेख गरे।

उपराष्ट्रपति जेडी भान्सले सामाजिक सञ्जाल प्लेटफर्मको स्वामित्व समाधान गर्ने सम्झौताको सामान्य सर्तहरू अप्रिल ५ सम्ममा पूरा हुने अपेक्षा गरेको बताएका छन्।

सन् २०२४ मा अत्यधिक द्विदलीय समर्थनमा पारित भएको कानूनले जनवरी १९ सम्ममा बाइटडान्सलाई टिकटकबाट अलग गर्न आवश्यक बनाएपछि लगभग आधा अमेरिकीहरूले प्रयोग गर्ने एपको भविष्य अन्योलमा परेको छ।