जलेर मृत्यु भएका पत्रकारको बारे सामाजिक सञ्जालमार्फत भ्रम फैलाउनेलाई कारबाही गर्ने प्रहरीको चेतावनी

काठमाडौं ।

जिल्ला प्रहरी परिसर काठमाडौंले शुक्रबार राजावादीहरुको प्रदर्शनको क्रममा भएको घटनामा ‘पत्रकारको शरीरमा गोली भेटिएको भन्दै’ सामाजिक सञ्जाल मार्फत गलत एवं भ्रामक समाचार सम्प्रेषण नगर्न आग्रह गरेको छ।

परिसरका सूचना अधिकारी प्र.उ.अपील राज बोहराले मृतकको पोस्टमार्टमनै नभईसकेको अवस्थामा जनमानसमा नकारात्मक सन्देश प्रवाह गराउने व्यक्ति एवं संस्थालाई प्रचलित बमोजिम कानुन कानुनी दायरामा ल्याइने जानकारी दिएका छन्।

परिसरले जारी गरेको प्रेस विज्ञप्तीमा चैत १५ गते आयोजित प्रदर्शनका क्रममा कार्यक्रमका आयोजक एवं समर्थकहरुले विभिन्न स्थानमा हिंसात्मक तोडफोड, आगजनी लगायत तीनकुनेस्थित एक घरमा भित्र मानिस भएकै अवस्थामा आगजनी गरी निजको मृत्यु समेत हुनेगरी विभिन्न अपराधिक घटनाहरु घटाएको उल्लेख छ।

सो सम्बन्धमा घटनाको गाम्भीर्यता तथा सत्य तथ्य समेत नबुझि विभिन्न सामाजिक सञ्जालहरुमा भ्रामक एवं गलत सूचना प्रवाह भईरहेको सन्दर्भ प्रति यस कार्यालयको गम्भीर ध्यानाकर्षण भएको जनाएको छ।

“उक्त दिन भएको अपराधिक घटनाहरुका सम्बन्धमा यस कार्यालयबाट सुक्ष्म अनुसन्धान भईरहेको साथै निज मृतकको पोष्टमार्टम कार्य नै प्रारम्भ भईनसकेको अवस्थामा विभिन्न सामाजिक सञ्जालहरुमा “चैत्र १५ गते मारिएका पत्रकार सुरेश रजकको पोष्टमार्टम रिपोर्टमा उनको शरिरमा गोली भेटिएको छ !” लगायतका शीर्षकहरु राखी सो घटनाका सम्बन्धमा वास्तविकता नबुझि विभिन्न सामाजिक सञ्जाल मार्फत गलत एवं भ्रामक समाचार सम्प्रेषण गरी जनमानसमा नकारात्मक सन्देश प्रवाह गराउने व्यक्ति एवं संस्थालाई प्रचलित बमोजिम कानुन कानुनी दायरामा ल्याइने व्यहोरा समेत अनुरोध गरिन्छ,” विज्ञप्तीमा भनिएको छ।