भारतमा एआई सेवा विस्तार गर्न ओपनएआई र मेटाद्वारा रिलायन्स इण्डस्ट्रिजसँग छलफल

काठमाडौं ।

ओपनएआई र मेटाले भारतमा आफ्नो कृत्रिम बुद्धिमता (एआई) सेवा विस्तार गर्नका लागि भारतको रिलायन्स इण्डस्ट्रिजसँग अलग-अलग छलफल गरेका प्राविधिक समाचार वेबसाइट द इन्फर्मेशनले शनिबार रिपोर्ट गरेको छ।

द इन्फर्मेशनले दुई स्रोतहरूलाई उद्धृत गर्दै छलफलमा रिलायन्स जियो र ओपनएआईबीच च्याटजीपीटी वितरणसम्बन्धी सहकार्यको सम्भावना रहेको जनाएको छ।

रोयटर्सका अनुसार ओपनएआईले आफ्ना कर्मचारीहरूसँग च्याटजीपीटीको सदस्यता शुल्क २० डलर मासिकबाट घटाएर केही डलर मात्र राख्ने विषयमा पनि छलफल गरेको रिपोर्टमा उल्लेख छ। तर, ओपनएआईले उक्त मूल्य घटाउने विचार रिलायन्स सँग साझेदारीमा ल्याएको हो वा होइन भन्ने स्पष्ट छैन।

रिलायन्सले आफ्नो व्यवसायिक ग्राहकहरूलाई ओपनएआईका मोडेलहरू एप्लिकेसन प्रोग्रामिङ इन्टरफेस (एपीआई) मार्फत बेच्ने विषयमा पनि छलफल गरेको द इन्फर्मेशनले जनाएको छ। साथै, ग्राहकहरूको डाटा भारतमै सुरक्षित राख्न ओपनएआईका मोडेलहरू स्थानीय रूपमा होस्ट गर्ने र सञ्चालन गर्ने विषयमा पनि छलफल भएको उल्लेख गरिएको छ।

विशेष गरी, रिलायन्सले गुजरात राज्यको जामनगर शहरमा विश्वकै सबैभन्दा ठूलो भनिएको तीन गीगावाट क्षमताको डाटा सेन्टर निर्माण गर्ने योजनामा मेटा र ओपनएआईका मोडेलहरू सञ्चालन गर्ने विषयमा छलफल गरेको छ।

मेटाले द इन्फर्मेशनको रिपोर्टमा कुनै प्रतिक्रिया दिएको छैन। ओपनएआई र रिलायन्सले भने रिपोर्टमा टिप्पणी गर्न तत्काल प्रतिक्रिया दिएका छैनन्।

रिलायन्स इण्डस्ट्रिज भारतको सबैभन्दा ठूला समूहहरूमध्ये एक हो, जसले पेट्रोकेमिकल्स, परिशोधन, तेल र ग्यास अन्वेषण, दूरसञ्चार, खुद्रा व्यापार र हरित ऊर्जा क्षेत्रमा व्यवसाय गर्दै आएको छ।