एलेक्साको उपस्थितिमा बोल्ने र भन्ने कुरामा सावधान रहन आग्रह, सबै जानकारी अमेजनमा पठाइने

काठमाडौं ।

अमेजनले एलेक्साको लागि सबै भ्वाइस रिक्वेस्ट (अनुरोध)हरू अमेजनको क्लाउडमा पठाइने र प्रशोधन गर्ने निर्णय गरेको छ। जसले गर्दा अब कुनै पनि स्थानीय प्रशोधन नहुने भएको छ।

अमेजनले आफ्ना इको डिभाइसहरूले काम गर्ने तरिकामा महत्त्वपूर्ण परिवर्तनको घोषणा गरेको छ, जसले प्रयोगकर्ताहरू माझ केही चिन्ता निम्त्याउन सक्ने उल्लेख गरिएको छ।

मार्च २८ तारिख देखि, डिभाइसमा कुनै पनि स्थानीय प्रशोधन क्षमताहरू बिना एलेक्सामा सबै भ्वाइस रिक्वेस्ट (अनुरोध) हरू स्वचालित रूपमा अमेजनको क्लाउडमा पठाइने र प्रशोधन गरिने टेलिग्राफले रिपोर्ट गर्दछ।

यो परिवर्तनको अर्थ प्रयोगकर्ताहरूले अब आफ्नो भ्वाइस रेकर्डिङको स्टोरेज (भण्डारण) डिसेबल (असक्षम) गर्न नस्कने बताइएको छ जुन पहिले प्राइभेसी सेटिङहरू मार्फत सम्भव हुने गरेको थियो।

सबै इको मालिकहरूले अमेजनको सर्भरहरूमा आफ्नो भ्वाइस डाटा प्रशोधन गर्न वा कोर एलेक्सा कार्यक्षमता गुमाउन सहमत हुनुपर्ने भएको छ।

यसबाहेक, पहिले भ्वाइस रेकर्डिङहरू सेभ गर्ने विकल्प डिसेबल (असक्षम) गर्ने प्रयोगकर्ताहरूले अब भ्वाइस आईडी सुविधामा पहुँच गुमाउने भएकाले यो विशेष गरी तिनीहरुका लागि समस्याग्रस्त हुने देखिएको उल्लेख छ जसले एलेक्सालाई उनीहरूसँग कसले कुरा गरिरहेको छ भनेर पहिचान गर्न र व्यक्तिगत प्रतिक्रियाहरू, जस्तै रिमाइन्डरहरू, संगीत सिफारिसहरू र क्यालेन्डर सूचनाहरू प्रदान गर्न अनुमति दिने गर्दछ।

त्यसैगरी भ्वाइस डाटा प्राइभेसी (गोपनीयता) को मुद्दा पनि रहेको बताइएको छ र अमेजनले भने यसको बारेमा चिन्ता लिनु नपर्ने बताईएको छ।

“अमेजनको सुरक्षित क्लाउडमा प्रसारणको क्रममा एलेक्सा भ्वाइस रिक्वेस्टहरू सधैं इन्क्रिप्ट गरिन्छन्, जुन प्रयोगकर्ताको गोपनीयता सुनिश्चित गर्न सेक्योरिटी प्रोटेक्सनका धेरै तहहरूसँग डिजाइन गरिएको छ। प्रयोगकर्ताहरूले अझै पनि एलेक्सा गोपनीयता ड्यासबोर्ड भित्र वा एप भित्र “एलेक्सा प्राइभेसी” खण्डमा क्लिक गरेर प्राइभेसी सेटिङहरूको सेटबाट छनौट गर्न सक्छन्” अमेजनले उल्लेख गरेको टेलीग्राफले रिपोर्ट गर्दछ।