महोत्तरीको सीमा क्षेत्रबाट क्रिप्टो कारोबारी चौधरी पक्राऊ

काठमाडौं ।

महोत्तरीको सीमा क्षेत्रमा अभौतिक मुद्रा अर्थात् क्रिप्टोकरेन्सीको कारोबारबाट विदेशी मुद्रा अपचलन हुने गरेको रहस्य खुलेको छ। यसको कारोबारमा नेपाल,मलेसिया र भारत गरीत्रिदेशीय नेटवर्किंङ गिरोहको संलग्नता रहेको पहरीको प्रारम्भिक अनुमान छ।

पहरीले रामगोपालपुर-७, सहसौलाका अनिल चौधरीलाई नियन्त्रणमा लिएपछि जिल्लाको सीमा क्षेत्रमा मौलाउँदै गएको क्रिप्टो कारोबारबारे पहिलो पटक रहस्य खुलेको हो।

जिल्लाको सीमा क्षेत्रमा विगत केही समयले क्रिप्टो गतिविधि बढेको सूचनाका आधारमा प्रहरीले नेपाल-भारत सीमास्थित जिल्लाको समसीचोकमा पकाउ गरेको चौधरीमाथि जिल्ला प्रहरीले अनुसन्धान गरिरहेको छ।

भर्खरै अनुसन्धान सुरु गरिएकाले चौधरीको क्रिप्टो सञ्जालमा को को संलग्न छन् र अहिलेसम्म कति बिदेशी मुद्रा अपचलन भयो भन्ने खुल्न सकेको छैन। तथापि जिल्ला प्रहरी अपराध अनुसन्धान शाखाका प्रहरी निरीक्षक विशाल सिंहका अनुसार चौधरीले नेपाल, मलेसिया र भारतमा रहेका निकटवर्तीसँग क्रिप्टो कारोबार गर्दै आएको प्रारम्भिक अनुसन्धानमा खुलेको छ।

पहरीका अनुसार क्रिप्टोकरेन्सी निजी क्षेत्रबाट जारी गरिएको मुद्राका रूपमा प्रयोग गर्न सकिने डिजिटल वस्तु हो। सर्वसाधारणका लागि सर्वथा नौलो क्रिप्टो सञ्जाल ग्रामीण भेगमा पनि विस्तारै झांगिदै गएको घटनाक्रमले देखाएको छ।

जानकारका अनुसार किप्टो करेन्सी अर्थात् अभौतिक मुद्रालाई युएसडिटी क्वाइन’ पनि भनिन्छ। सन् २००९ मा ओपन सोर्स सफ्टवेयरका रूपमा पहिलो पटक बिटक्वाइन’ सार्वजनिक भएदेखि क्रिप्टो करेन्सी सिर्जना भएको थियो।

नेपालमा यसको कारोबारमा विदेशीमुद्रा विनियम अभियोग अर्न्तगत मुद्दा चल्ने गरेको छ। राष्ट्र बैकले २०७४ देखि नै क्रिप्टो कारोबारलाई आर्थिक अपराध मान्दै आएको छ। पक्राउ परेका चौधरीबाट क्रिप्टोबारे कुरा खुल्दै गएपछि यो आफ्ना लागि पनि नयाँ मुद्दा भएको प्रहरी उपरीक्षक नकुल पोखरेलले बताए।

उनका अनुसार चौधरीले प्रयोग गरेको मोबाइल फोनलाई प्रहरीले काठमाडौँस्थित केन्द्रीय प्रहरीको डिजिटल फरेन्सिक ल्याब’ मा अनुसन्धानका लागि पठाएको छ।

पहरी उपरीक्षक पोखरेलले भने, “क्रिप्टो कारोबार यहाँका लागि पनि नयाँ मुद्दा हो। केन्द्रबाट फोन डिटेल्स प्राप्त भएपछि त्यसैका आधारमा गरिने अनुसन्धान तहकिकातपछि अभियोगबारे टुङ्गो लाग्ने छ। हामी फोन डिटेल्सको प्रतीक्षामा छौं।”

आजको गोरखापत्रबाट