सर्भरमा समस्या आउँदा गुल्मीमा राष्ट्रिय परिचयपत्र बनाउने सेवाग्राहीको भिड

काठमाडौं ।

गत फागुन २७ गतेदेखि तीन दिनसम्म सर्भरमा समस्या आएका कारण जिल्ला प्रशासन कार्यालय गुल्मीमा सेवाग्राहीको चाप बढेको छ। तीन दिनसम्म राष्ट्रिय परिचयपत्रको सर्भरमा समस्या आएका कारण अहिले राष्ट्रिय परिचयपत्र बनाउनेको भिड लागेको सहायक प्रमुख जिल्ला अधिकारी हरिप्रसाद गैरेले जानकारी दिनुभयो।

४० देखि ५० जनासम्मको क्षमता रहेको प्रशासन कार्यालय गुल्मोमा आइतबार मात्रै ३०३ जनाले सेवा लिएको उनले बताए। ३०३ जनामध्ये १३७ जनाले राष्ट्रिय परिचयपत्र प्राप्तिका लागि विवरण दर्ता
१५१ जनालाई परिचयपत्र वितरण र १५ जनाको विवरण त्रुटि भएकाले सच्चाउने काम भएको गैरेले बताए।

सोमबार पनि जिल्ला प्रशासनमा परिचयपत्र बनाउनेको भिड रहेको उनले बताए। राज्यले राष्ट्रिय परिचयपत्र अनिवार्य गर्ने नीति लिएपछि परिचयपत्र बनाउनेको सख्यामा वृद्धि भएको हो। जिल्ला प्रशासनको तीन वटा स्टेसनबाट राष्ट्रिय परिचयपत्र बनाउने काम गरिएको छ।

गुल्मीमा करिब ८० हजारभन्दा बढीलाई राष्ट्रिय परिचयपत्र वितरण गरिएको छ भने दुई लाख १० हजारभन्दा बढीले राष्ट्रिय परिचयपत्र प्राप्तिका लागि विवरण दर्ता गराएका छन्। जसमध्ये एक लाख ८९ हजारको राष्ट्रिय परिचयपत्र बनेर आएको जिल्ला प्रशासन कार्यालय गुल्मीले जनाएको छ।

आजको गोरखापत्रबाट