फक्सकनद्वारा पहिलो ठूलो भाषा मोडेल सार्वजनिक

काठमाडौं ।

ताइवानको फक्सकनले सोमबार पहिलो ठूलो भाषा मोडेल सार्वजनिक गरेको छ र यस प्रविधिलाई उत्पादन तथा आपूर्ति शृंखला व्यवस्थापनमा सुधार गर्न प्रयोग गर्ने योजना बनाएको छ।

“फक्सब्रेन” नामको यो मोडेल एनभिडियाका १२० वटा H100 जीपीयू प्रयोग गरी चार हप्तामा प्रशिक्षण गरिएको फक्सकनले एक विज्ञप्तिमा जनाएको छ।

एप्पलका लागि आइफोन असेंबल गर्ने तथा एनभिडियाका कृत्रिम बुद्धिमत्ता सर्भर उत्पादन गर्ने फक्सकनले मोडेल मेटाको एललामा ३.१ आर्किटेक्चरमा आधारित रहेको जनाएको छ। यो ताइवानको पहिलो ठूलो भाषा मोडेल हो जसमा तर्क गर्ने क्षमता छ र परम्परागत चिनियाँ तथा ताइवानी भाषा शैलीअनुकूल बनाइएको छ।

फक्सकनका अनुसार चीनको डीपसिकको डिस्टिलेसन मोडेलसँग केही कार्यक्षमतामा अन्तर देखिए पनि यसको समग्र प्रदर्शन विश्वस्तरीय मापदण्डको नजिक छ।

प्रारम्भमा आन्तरिक प्रयोगका लागि डिजाइन गरिएको फक्सब्रेनले डाटा विश्लेषण, निर्णय समर्थन, कागजात सहकार्य, गणित, तर्क तथा समस्या समाधान, र कोड उत्पादनमा काम गर्छ।

रोयटर्सका अनुसार फक्सकनले प्रविधि साझेदारहरूसँग सहकार्य गरी मोडेलको प्रयोग विस्तार गर्ने, यसको ओपन-सोर्स जानकारी साझा गर्ने, तथा उत्पादन, आपूर्ति शृंखला व्यवस्थापन र बुद्धिमान निर्णय प्रक्रियामा एआई प्रवर्द्धन गर्ने योजना बनाएको छ।

एनभिडियाले ताइवानस्थित सुपरकम्प्युटर “ताइपेई-१” मार्फत सहयोग प्रदान गरेको थियो र मोडेल प्रशिक्षणका क्रममा प्राविधिक परामर्श दिएको थियो।

जुन ताइवानको सबैभन्दा ठूलो सुपरकम्प्युटर ताइपेई-१ एनभिडियाले दक्षिणी सहर काउशुंगमा स्वामित्वमा राखी सञ्चालन गरेको हो। फक्सकनले मार्चको मध्यतिर एनभिडियाको जीटीसी डेभलपर सम्मेलनमा मोडेलसम्बन्धी थप विवरण घोषणा गर्नेछ।