गुगललाई विभाजन गर्ने अमेरिकी न्याय विभागको प्रयास अझै जारी

काठमाडौं ।

अमेरिकी न्याय विभाग (डीओजे) अझै पनि गुगललाई विभाजन गर्ने प्रयासमा छ। शुक्रबार संघीय न्यायाधीश अमित मेहतासमक्ष दायर गरिएको परिमार्जित प्रस्तावअनुसार, गुगल ले आफ्नो वेब ब्राउजर गुगल क्रोम र सम्भावित रूपमा एण्ड्रोइड बेच्नुपर्ने हुन सक्छ। न्यूयोर्क टाइम्सका अनुसार, न्यायाधीश मेहताले गुगललाई एकाधिकारवादी ठहर गरेपछि यो कदम उठाइएको हो।

नयाँ दायरामा डीओजे ले गुगललाई “आर्थिक दिग्गज” भन्दै उसले अमेरिकी उपभोक्ताहरूलाई बजारमा छनोट गर्ने आधारभूत अधिकारबाट वञ्चित गरेको आरोप लगाएको छ। यसलाई सुधार गर्न, “गुगलले क्रोम ब्राउजर बेच्नु पर्दछ … जसले नयाँ प्रतिस्पर्धीलाई इन्टरनेट खोजीको महत्त्वपूर्ण प्रवेशद्वार सञ्चालन गर्ने अवसर प्रदान गर्नेछ।” विभागले गुगललाई एण्ड्रोइड सञ्चालन प्रणाली बेच्न वा यसको व्यापारिक अभ्यास परिवर्तन गर्नुपर्ने सिफारिस गरेको द भर्जले उल्लेख गरेको छ।

डीओजेले गत वर्ष नै यी विभाजन प्रस्तावहरू अघि सारेको थियो। तर प्रविधि कम्पनीहरूले राष्ट्रपति ट्रम्पलाई समर्थन गरेको देखिएको अवस्थामा, उनले यस योजनालाई कति समर्थन गर्ने भन्ने अनिश्चित छ।

ट्रम्प प्रशासनले एआई सुरक्षा र क्रिप्टोकरेन्सी जस्ता क्षेत्रमा बाइडेन सरकारका केही प्रविधि नियमहरू खुकुलो बनाइसकेको छ। तर, उनले चाहेको परिणाम निकाल्न नियमनको धम्की उपयोगी हुन सक्ने संकेत दिएका छन्।

नयाँ प्रस्ताव केही नरम भएको देखिन्छ। डीओजेले अब गुगललाई खोजीबाहेक अन्य सेवाहरूको लागि एप्पललाई भुक्तानी गर्न अनुमति दिन सक्ने संकेत गरेको छ। साथै गुगललाई आफ्नो एआई लगानी बन्द गर्न बाध्य पार्नुभन्दा, संघीय र राज्य अधिकारीहरूलाई जानकारी गराएर मात्र नयाँ एआई लगानी गर्न दिने सुझाव दिएको छ।

गुगलले आफ्नो प्रस्ताव पनि पेश गरेको छ, जसमा क्रोम बेच्ने योजना समावेश छैन। यसको सट्टा, उसले अदालतलाई केही व्यापार सम्झौताहरूमा प्रतिबन्ध लगाउन आग्रह गरेको छ। जस्तै, गुगल प्ले लाइसेन्स गर्ने फोन निर्माताहरूलाई अन्य गुगल एपहरू, जस्तै गुगल सर्च वा क्रोम अनिवार्य रूपमा प्री-इन्स्टल गर्न नपर्ने व्यवस्था गरिनु पर्ने प्रस्ताव गरेको छ।

न्यूयोर्क टाइम्सका अनुसार, यी प्रस्तावहरूमा छलफल गर्न आगामी अप्रिलमा सुनुवाइ तय गरिएको छ।