प्रहरी अनुसन्धानमा डिजिटल, फरेन्सिक तथा एआई प्रविधि समावेश गर्न ऐनमा उल्लेख गर्नुपर्छ: सांसद भण्डारी

काठमाडौं ।

रास्वपाकी सांसद चन्दा कार्की भण्डारीले अनुसन्धान प्रक्रियामा डिजिटल अभिलेख, फरेन्सिक प्रविधि, साइबर अनुसन्धान र एआईजस्ता प्रविधिहरु समावेश गर्न कानुनी आधार ऐनमा उल्लेख हुनुपर्ने बताएकी छिन्।

नेपाल प्रहरी ऐन २०१२ को संशोधनमाथि सैद्धान्तिक छलफलका क्रममा सांसद भण्डारीले यस्तो बताएकी हुन्। प्रहरीलाई बलियो, निष्पक्ष र प्रविधिसम्पन् बनाइएमात्र शान्ति सुरक्षा सम्भव हुने उनको भनाई थियो।

‘प्रहरीलाई देख्दा नागरिकले राहतको महसुस गर्छन्, प्रहरी राज्यको उपस्थिति हो। तर प्रहरी आफैं संकटमा छ। आधुनिक प्रविधि र पर्याप्त स्रोतसाधन छैन’, सांसद भण्डारीले भनिन्।

आजको युग प्रविधिको युग भएकाले अपराधहरु पनि प्रवधिसँगै परिस्कृत हुँदै गएका तर हाम्रो प्रहरी पुरानै संरचना र सीमित स्रोतसाधनमा अड्केको उनले प्रस्ट्याइन्।

२१ औं शताब्दीको प्रहरी चाहने हो भने प्रविधि, अनुसन्धान र तालिममा लगानी गरेर प्रहरीलाई सशक्त बनाउनु अति आवश्यक हुने भन्दै सांसद भण्डारीले प्रहरीको सम्पूर्ण जिम्मा राज्यको हुने र उनीहरुको तलब भत्ता र सुविधा राज्यले उपलब्ध गराउनु पर्ने, आफ्नो जोहो आफैं गर जस्ता नीति ल्याउन नहुने बताइन्।