सामाजिक सञ्जाल नियन्त्रण गर्न अति जरुरी छ: मन्त्री यादव

काठमाडौं ।

मधेश प्रदेशका भौतिक पूर्वाधारमन्त्री सरोजकुमार यादवले पत्रकारिता र सामाजिक सञ्जालमा देखिएको छाडापन नियन्त्रण गर्न अति जरुरी रहेको बताएका छन्।

बर्दीबासमा शनिबार प्रेस चौतारी नेपाल महोत्तरी शाखाको दोस्रो जिल्ला अधिवेशनको उद्घाटन गर्दै मन्त्री यादवले सामाजिक सञ्जाल र पत्रकारितामा मौलाएको गैरजिम्मेवारीलाई कानुन बनाएर जिम्मेवार बनाउनुपर्ने बताएका हुन्।

उनले भने, “पत्रकारिता र सामाजिक सञ्जालमा छाडापन देखिएको छ। बिनातथ्य प्रमाण र आधारमा लेख्ने प्रवृत्ति मौलाउँदै गएको छ। यो विषयमा पत्रकार पनि संवेदनशील हुनु पर्छ।” सरकारले सामाजिक सञ्जाल नियमन विधेयक संसदमा पेस गरेको छ।

प्रदेश सरकारले व्यावसायिक पत्रकारलाई व्यवस्थित र मर्यादित बनाउन काम गरिरहेको मन्त्री यादवले उल्लेख गरे। पत्रकारको स्वास्थ्य तथा दुर्घटना बिमा र लोककल्याणकारी विज्ञापन पनि प्रदेश सरकारले उपलब्ध गराउँदै आएको र पत्रकारिता शिक्षा अध्ययनमा पत्रकारलाई सहयोग गर्ने कार्ययोजनासमेत प्रस्तुत भइसकेको उनले जानकारी दिए।

“प्रदेशमा सञ्चार ऐन ड्राफ्ट भइसकेको छ। प्रदेश सरकारले टेलिभिजन पनि प्रदेशमै दर्ता गर्न मिल्ने व्यवस्था गर्न लागेको छ,” मन्त्री यादवले भने।

मधेश प्रदेशको गरिमा बढाउने गरी अहिलेको सरकारले काम गरिरहेको बताउँदै मन्त्री यादवले यसै वर्ष १५ अर्ब बराबरको बजेट भौतिक पूर्वाधार मन्त्रालय अन्तर्गतका योजनाको टेन्डर प्रक्रिया अधि बढाइरहेको जानकारी दिए।

उद्घाटन सत्र समापनलगत्तै बसेको बन्द सत्रले प्रेस चौतारी नेपाल महोत्तरी शास्त्रको अध्यक्षमा रामनारायण महतोलाई निर्वाचित गरेको छ। महतोको नेतृत्वमा ११ सदस्यीय नयाँ कार्यसमिति सर्वसम्मत चयन भएको हो।

आजको गोरखापत्रबाट