काठमाडौं ।
अलिबाबा ग्रुपका अध्यक्ष जो साइले कम्पनीले चीनमा बिक्री हुने आईफोनहरुका लागि एआई उपलब्ध गराउन एप्पलसँग साझेदारी गरिएको बिहीबार पुष्टि गरेका छन्। उनले यो घोषणा दुबईमा आयोजित वर्ल्ड गभर्नमेन्ट समिटमा गरेका हुन्।
एप्पलले चीनमा धेरै कम्पनीहरूसँग छलफल गरेको थियो, अन्ततः उनीहरूले हामीसँग सहकार्य गर्ने निर्णय गरे। उनीहरू आफ्ना फोनहरूलाई हाम्रो एआईको माध्यमबाट चलाउन चाहन्छन्,” साइले भने।
यो साझेदारीबारे पहिलो पटक मंगलबार टेक-सम्बन्धी समाचार संस्था द इन्फर्मेशनले रिपोर्ट गरेको थियो र त्यसपछि अलिबाबा र एप्पलको सेयर मूल्यमा वृद्धि देखिएको थियो।
बिहीबार अलिबाबाका हङकङ-सूचीबद्ध सेयरहरू २०२२ यताकै उच्च स्तरमा पुगेका थिए, यद्यपि दिनको अन्त्यतिर केही गिरावट आयो। अन्तिम अवस्थामा सेयर मूल्य २.५ प्रतिशतले वृद्धि भएको थियो।
यो घोषणा चीनमा एप्पल को एआई रणनीति स्पष्ट गर्न मद्दत गर्न सक्छ, विशेष गरी आईफोनको बजार हिस्सा विश्वकै ठूलो स्मार्टफोन बजारमा घट्दै गएको छ।
ह्वावेजस्ता स्वदेशी प्रतिस्पर्धी कम्पनीहरूले गत वर्षदेखि आफ्ना डिभाइसहरूमा एआई फिचरहरू समावेश गरिरहेका छन्, तर एप्पल ले आफ्नो ‘एप्पल इन्टेलिजेन्स’ योजनाबारे चीनमा अहिलेसम्म धेरै चर्चा गरेको छैन, यद्यपि यो सेवा यस वर्षको अन्त्यसम्म अमेरिकामा सुरु गर्ने योजना छ।
एप्पल इन्टेलिजेन्स भनेको एप्पलको एआई सेवाहरू ल्याउने योजना हो, जसमा सुधारिएको सिरी, ईमेलहरू स्वचालित रूपमा व्यवस्थापन गर्ने प्रणाली, तथा अडियो ट्रान्सक्रिप्सन र संक्षेपिकरण फिचरहरू समावेश रहेको सीएनबीसीले उल्लेख गरेको छ।
विश्लेषकहरूले सीएनबीसीलाई बताए अनुसार चीनमा एप्पलको एआई सेवा सुरु गर्न कठिनाइ भइरहेको छ, किनकि चीनले यस क्षेत्रमा कडा नियमन लागू गरिरहेको छ।
बेइजिङले पछिल्ला वर्षहरूमा एआई सम्बन्धी विभिन्न नियमहरू लागू गरेको छ, जसअनुसार ठूला भाषा मोडेलहरूलाई व्यावसायिक प्रयोगका लागि अनुमोदन आवश्यक हुन्छ। साथै, जेनेरेटिभ एआई सेवा प्रदायकहरूले “गैरकानुनी” सामग्री हटाउने जिम्मेवारी लिनुपर्ने नियम पनि लागू गरिएको छ।
तर, साइका अनुसार अलिबाबा सँगको साझेदारीले एप्पल लाई चीनको नियमन प्रणाली सहज रूपमा व्यवस्थापन गर्न र स्थानीय स्तरमा एआई अनुकूल बनाउन मद्दत गर्नेछ।
अलिबाबा चीनका ठूला प्रविधि कम्पनीहरूमध्ये एक हो, जसले आफ्नै ठूला भाषा मोडेलहरू र भ्वाइस असिस्टेन्टहरू विकास गरेको छ।
प्रकाशित: २ फाल्गुन २०८१, शुक्रबार
