निसान र होण्डा एउटै कम्पनी नहुने, टर्यो मर्जरको सम्भावना

काठमाडौं ।

निसान र होण्डा ले एउटै अटोमेकर बन्ने योजना आधिकारिक रूपमा रद्द गरेका छन्। यी कम्पनीहरूले एकसाथ आउने चर्चा सत्य भएको पुष्टि गरेको दुई महिनाभित्रै यो निर्णय लिएको हो।

एक घोषणामा कम्पनीहरूले २०२४ डिसेम्बरमा हस्ताक्षर गरेको समझदारी पत्र खारेज गर्न सहमति जनाएका बताए। यदि यो मर्जर सफल भएको भए र निसानको नियन्त्रणमा रहेको मित्सुबिसीसमेत समावेश भएको भए नयाँ कम्पनीको कुल सम्पत्ति करिब ५० अर्ब डलर हुने थियो।

अटोमेकरहरूले बताएअनुसार उनीहरूका सीईओहरू र व्यवस्थापन टोलीका सदस्यहरूले मर्जरबाट हासिल गर्न चाहेको लक्ष्य र एकीकरणपछि आवश्यक संरचनाहरूबारे छलफल गरेका थिए। उनीहरूले अन्तिम संरचना कस्तो हुने भन्ने विषयमा विभिन्न विकल्पहरू विचार गरेका थिए।

इन्ग्याजेटका अनुसार होण्डाले केही विकल्पहरू प्रस्ताव गरेको थियो, जसमा एउटा संयुक्त होल्डिङ कम्पनी स्थापना गर्ने योजना पनि थियो, जहाँ सीईओ तथा बहुसंख्यक निर्देशक नियुक्त गर्ने अधिकार होण्डा सँग हुन्थ्यो। साथै, अर्को संरचनाअनुसार होण्डा मूल कम्पनी रहने र निसान यसको सहायक कम्पनी हुने प्रस्ताव गरिएको थियो।

फाइनान्सियल टाइम्सले फेब्रुअरीको सुरुवातमा रिपोर्ट गरेअनुसार होण्डाले निसानलाई सहायक कम्पनी बनाउने संरचना ‘लेउ वा छोड’ प्रस्तावका रूपमा राखेको थियो। निसानको बोर्डका अधिकांश सदस्यहरूले उक्त प्रस्ताव अस्वीकार गरेको बताइन्छ तर निसान ले औपचारिक रूपमा निर्णय घोषणा गर्न मध्य-फेब्रुअरीसम्म प्रतीक्षा गरेको थियो।

अटोमेकरहरूले भनेअनुसार निर्णय लिन र व्यवस्थापन रणनीति कार्यान्वयन गर्न तीव्रता आवश्यक भएकाले वार्ता रोक्ने निर्णय गरिएको हो। उनीहरूले विद्युतीकरण युगतर्फ अघि बढ्दै गर्दा तीव्र गतिमा निर्णय लिनुपर्ने चुनौती रहेको बताए। साथै, दुवै कम्पनीले ‘बौद्धिक र विद्युतीकरण युग’ का लागि रणनीतिक साझेदारी अन्तर्गत सहकार्य गर्ने योजना यथावत रहने उल्लेख गरेका छन्।

सम्बन्धित समाचार:

जापानको होन्डा र निसानबीच एकीकरणका लागि प्रारम्भिक वार्ता