सफ्टबैंकले रेनी जेम्सको चिप कम्पनी एम्पियर किन्न सक्ने, साढे ६ अर्ब डलर मूल्याङ्कनको अनुमान

काठमाडौं ।

पूर्व इन्टेल कार्यकारी रेनी जेम्सद्वारा स्थापित सेमीकन्डक्टर कम्पनी एम्पियर सफ्टबैंकले खरिद गर्ने तयारीमा रहेको सुन्नमा आएको छ।  ब्लूमबर्गका अनुसार यो सम्झौताले एम्पियरको मूल्यांकन करिब साढे ६ अर्ब डलर गर्न सक्छ जुन २०२१ मा भएको ८ अर्ब डलरको मूल्यांकनभन्दा कम हो।

एम्पियरले डाटा सेन्टरका लागि आर्म चिप्स डिजाइन गर्छ, जुन सफ्टबैंकका लागि उपयुक्त हुन सक्छ। सफ्टबैंक इन्टेल को बहुसंख्यक मालिक हो। एम्पियरले यो विषयमा कुनै टिप्पणी गरेको छैन।

टेकक्रञ्चका अनुसार एम्पियर सन् २०१७ मा रेनी जेम्सद्वारा स्थापित गरिएको थियो। इन्टेल मा २८ वर्ष काम गरेपछि सीईओ पदको लागि नछानिएपछि उनले कम्पनी छोडेकी थिइन्।

त्यसपछि उनी निजी इक्विटी कम्पनी कार्लाइलमा डिलमेकरको रूपमा काम गरिरहेकी थिइन् र ओर्याकलको बोर्ड सदस्य पनि थिइन्।

जेम्सले चिप निर्माता म्याकमले आफ्नो चिप व्यवसायको एउटा भाग बेच्न चाहिरहेको पत्ता लगाइन् र कार्लाइल र ओर्याकललाई उक्त भाग किन्न सहयोग गर्न प्रस्ताव गरिन्। दुवैले यस अधिग्रहणलाई आर्थिक रूपमा सहयोग गर्न सहमति जनाए।

एम्पियर स्थापना गरेपछि जेम्स सेमिकन्डक्टर कम्पनी चलाउने दुई महिलामध्ये एक बनिन्। अर्की महिला एएमडीकी सीईओ लिसा सु हुन्।

जेम्सको विचार कम-ऊर्जा आर्म डिजाइनहरूबाट डाटा सेन्टर चिप्स बनाउने थियो, जुन त्यो समयमा नयाँ अवधारणा थियो।ओर्याकल र माइक्रोसफ्टजस्ता ठूला क्लाउड प्रदायकहरू यसको ग्राहक बने।

तर अक्टोबरमा ओर्याकलले आफ्नो वार्षिक प्रतिवेदनमा एम्पियरको २९ प्रतिशत हिस्सा स्वामित्वमा रहेको र विकल्प र रूपान्तरणीय नोटहरू पनि रहेको खुलासा गर्‍यो। यी सम्झौताहरू एम्पियर र अन्य नाम नखुलाइएका लगानीकर्ताहरूसँग गरिएको थियो।

ओर्याकलले भनेको छ, “यदि यी मध्ये कुनै पनि विकल्प हामीले वा हाम्रा सह-लगानीकर्ताले प्रयोग गरेमा, हामी एम्पियरमा नियन्त्रण प्राप्त गर्न सक्छौं र यसको नतिजाहरूलाई हाम्रो सञ्चालन परिणामहरूसँग एकाकार गर्न सक्छौं।”

ओर्याकलले सोही प्रतिवेदनमा भनेको छ कि जेम्स मध्य-नोभेम्बरमा आफ्नो कार्यकाल समाप्त भएपछि बोर्ड छोड्नेछिन्। उनी सन् २०१५ देखि ओर्याकल बोर्ड सदस्य थिइन्।

एम्पियर निजी कम्पनी भएकाले जेम्सको स्वामित्वमा कति हिस्सा छ भन्ने स्पष्ट छैन। उनी स्थापना भएदेखि सीईओको रूपमा काम गरिरहेकी छिन्।

एम्पियर सेप्टेम्बरदेखि बिक्रीको बजारमा रहेको बताइएको छ। तर सफ्टबैंक सँगको सम्झौता अन्तिम छैन। ब्लूमबर्गका स्रोतहरूका अनुसार सम्झौताका शर्तहरू परिवर्तन हुन सक्छन् वा सम्झौता नै रद्द हुन सक्ने टेकक्रञ्चले उल्लेख गरेको छ।