भारतीय अन्तरिक्ष एजेन्सीले पूरा गर्यो पहिलो गगनयान अन्तरिक्षयात्री क्रू क्याप्सुल निर्माण

काठमाडौं ।

भारतीय अन्तरिक्ष एजेन्सीले अन्तरिक्ष यात्रीलाई अन्तरिक्षमा लैजाने र पृथ्वीमा सुरक्षित फर्काउने क्षमतासहितको क्याप्सुल निर्माण सम्पन्न गरको छ। भारतीय अन्तरिक्ष यात्रीलाई अन्तरिक्षमा लैजाने र पृथ्वीमा सुरक्षित फर्काउने क्षमतासहितको क्याप्सुलमा यसको मुख्य प्रविधि जडान गरिसकिएको छ। यसले देशको स्वदेशी मानव अन्तरिक्ष उडान क्षमताको विकासतर्फको अर्को महत्वपूर्ण कदमलाई चिन्हित गरेको भारतीयहरुको बुझाई छ।

भारतीय अन्तरिक्ष अनुसन्धान संगठन (इसरो) ले बुधबार (जनवरी २२) घोषणा गरेअनुसार बेंगलुरु केन्द्रले गगनयान क्रु मोड्युलको एसेम्ब्ली पूरा गरेको छ र यसलाई लिक्विड प्रोपल्सन सिस्टमले सुसज्जित गरेको छ।

यो प्रणाली क्याप्सुलको दिशा र मार्ग नियन्त्रण गर्न आवश्यक थ्रस्ट उत्पादन गर्न जिम्मेवार हुन्छ। यसले क्याप्सुललाई पृथ्वीको वायुमण्डल पुनः प्रवेश गरेपछि सुरक्षित अवतरण सुनिश्चित गर्दछ, जहाँ प्यारासुट प्रयोग गरी सुरक्षित रूपमा अवतरण गरिन्छ।

स्पेस डटकमका अनुसार अब क्रु मोड्युललाई केरलाको विक्रम साराभाई स्पेस सेन्टरमा लगिनेछ, जहाँ यो सञ्चार, नेभिगेसन र पावर व्यवस्थापनका लागि आवश्यक इलेक्ट्रोनिक्सले सुसज्जित हुनेछ, जुन उडान सञ्चालनको समयमा स्पेसक्राफ्ट नियन्त्रण गर्न अत्यावश्यक हुन्छ।

इसरोको जनवरी २२ को विज्ञप्तिअनुसार यी कार्यहरू पूरा भएपछि क्रु मोड्युललाई आन्ध्र प्रदेशको श्रीहरिकोटास्थित अन्तरिक्ष केन्द्रमा पठाइनेछ जहाँ यसलाई कक्षीय मोड्युलसँग एकीकृत गरिनेछ।

भारतले सन् २०२६ भन्दा अगाडि दुई अन्तरिक्ष यात्रीलाई पृथ्वीको तल्लो कक्षमा पठाउने योजना बनाएको छ। तर त्यसअघि कम्तीमा चारवटा मानवरहित परीक्षण गर्ने योजना छ। पहिलो परीक्षण, जी१ मा क्रु र सर्भिस मोड्युल, पुनःप्रवेश, प्यारासुट प्रयोग, र बंगालको खाडीमा सुरक्षित अवतरण परीक्षण गरिनेछ।

जी१ मिशन मानवरहित हुने भए पनि यसले “व्योममित्र” नामक मानवरूप रोबोटलाई पनि बोक्नेछ, जसले प्रविधि परीक्षणमा सहयोग गर्नेछ। इसरोले यस परीक्षण उडानको मिति घोषणा गरेको छैन, तर स्थानीय मिडिया रिपोर्टका अनुसार यो वर्षको सुरूमा, सम्भवतः फेब्रुअरीमै, प्रक्षेपण हुने अनुमान गरिएको छ।

यस वर्ष भारतले १० कक्षीय प्रक्षेपण गर्ने लक्ष्य लिएको छ, तर तिनीहरुमा जी२ र जी३ परीक्षण उडानहरू समावेश नहुनेजस्तो देखिन्छ।