एयरटेलले भारतमा स्याटेलाइट टेलिकम सेवा सुरु गर्ने तयारी गर्दै, सरकारबाट स्वीकृतिको पर्खाइमा

काठमाडौं ।

भारतको दूरसञ्चार कम्पनीहरू मध्ये एक भारती इन्टरप्राइजेजले स्याटेलाइट दूरसञ्चार सेवा सुरु गर्न तयार रहेको बताएको छ। यो सेवाको लागि केन्द्र सरकारको स्वीकृति पर्खिरहेको छ।

अर्बपति इलन मस्कको कम्पनी स्टारलिङ्कले पनि स्याटेलाइट इन्टरनेट सेवा सुरु गर्न भारत सरकारसँग अनुमति मागेको छ।

भारती इन्टरप्राइजेजका उपाध्यक्ष राजन भारती मित्तलले भने, “हामी स्पेक्ट्रम बाँडफाँडको लागि पर्खिरहेका छौं। गुजरात र तमिलनाडुमा हाम्रा दुई स्टेशनहरू तयार छन्। अनुमति पाएपछि हामी यो सेवा सुरु गर्नेछौं।”

स्थानीय मिडिया रिपोर्टअनुसार, उनले भारती इन्टरप्राइजेजले ६३५ ओटा भूउपग्रह प्रक्षेपण गरिसकेको र कम्पनीले अन्य देशहरूलाई सेवा प्रदान गरिरहेको बताए। प्रशासनिक प्रक्रिया वा लिलामी मार्फत स्पेक्ट्रम बाँडफाँडमा विगत केही महिनादेखि चलिरहेको विवादको बारेमा सोध्दा, मित्तलले भारती एयरटेलको अडान दोहोर्याए। उनले स्याटेलाइट कम्पनीहरूले लाइसेन्स शुल्क तिर्नुपर्छ र लिलामी मार्फत स्पेक्ट्रम प्राप्त गर्नुपर्ने बताए।

मित्तलले भने, “हामी सबैले समान खेल मैदान हुनुपर्छ भनिरहेका छौं। यो ती क्षेत्रहरूको लागि राम्रो हो जहाँ स्थलीय नेटवर्कहरू पुग्न सक्दैनन्। हामी सरकारबाट सुझावहरूको प्रतीक्षामा छौं।”

देशको सबैभन्दा ठूलो दूरसञ्चार कम्पनी रिलायन्स जियोले पनि स्याटेलाइट स्पेक्ट्रमको लागि इजाजतपत्र शुल्क तिर्न र दूरसञ्चार सेवाहरूको लागि स्पेक्ट्रम खरिद गर्ने विकल्प रोजेको छ।

हालै, भारतका दूरसञ्चार मन्त्री ज्योतिरादित्य सिन्धियाले स्याटेलाइट स्पेक्ट्रमको बितरणले उपभोक्ताहरूलाई थप विकल्पहरू दिने बताएका थिए। उनले, यसले स्टारलिङ्कलाई फाइदा पुर्याउँछ भन्ने रिलायन्स जियोको आशंकालाई गलत भनेका थिए।

पछिल्ला केही महिनादेखि, स्टारलिङ्क मुकेश अम्बानीको रिलायन्स जियोसँग स्याटेलाइट इन्टरनेट सेवाको लागि स्पेक्ट्रम दिने प्रक्रियालाई लिएर विवादमा थियो। रिलायन्स जियोले स्याटेलाइट स्पेक्ट्रमको लिलामीको माग गरेको थियो। यद्यपि, सरकारले अन्तर्राष्ट्रिय प्रवृत्ति अनुसार यो स्पेक्ट्रम बाँडफाँड गर्ने निर्णय गरेको छ।

ई-कमर्स र प्रविधि कम्पनी अमेजनको एक एकाइले पनि भारतमा स्याटेलाइट इन्टरनेट सेवाको लागि स्वीकृति खोजेको रिपोर्टमा उल्लेख छ।