काठमाडौं ।
अमेरिकी राष्ट्रपति डोनाल्ड ट्रम्पले बिहीबार एउटा कार्यकारी आदेशमा हस्ताक्षर गरेका छन्, जसले अमेरिकालाई एआईको विश्व राजधानी बनाउने उद्देश्य राखेको छ। यो जानकारी उनका सहायकले ह्वाइट हाउसको ओभल अफिसमा पत्रकारलाई बताएका छन्।
यो आदेशले १८० दिनभित्र एआई कार्ययोजना तयार गर्न निर्देशन दिएको छ, जसले “मानव विकास, आर्थिक प्रतिस्पर्धात्मकता र राष्ट्रिय सुरक्षाको लागि अमेरिकाको विश्वव्यापी एआई प्रभुत्वलाई कायम राख्ने र वृद्धि गर्ने” नीति बनाउनेछ।
ट्रम्पले आफ्नो एआई सल्लाहकार र राष्ट्रिय सुरक्षा सहायकलाई पूर्व राष्ट्रपति जो बाइडेनले लागू गरेका नीति र नियमहरू हटाउन काम गर्न भने।
रोयटर्सका अनुसार ट्रम्पले सोमबार बाइडेनले २०२३ मा हस्ताक्षर गरेको एक कार्यकारी आदेश रद्द गरे, जसले उपभोक्ता, कामदार र राष्ट्रिय सुरक्षामा कृत्रिम बुद्धिमताले पार्ने जोखिमलाई कम गर्ने लक्ष्य राखेको थियो।
बाइडेनको आदेशले अमेरिकाको राष्ट्रिय सुरक्षा, अर्थतन्त्र, सार्वजनिक स्वास्थ्य वा सुरक्षामा जोखिम उत्पन्न गर्ने एआई प्रणालीका विकासकर्ताहरूलाई डिफेन्स प्रोडक्शन एक्टअनुसार, ती सार्वजनिक रूपमा जारी गर्नु अघि सुरक्षा परीक्षणको परिणाम अमेरिकी सरकारसँग साझा गर्न अनिवार्य गरेको थियो।
प्रकाशित: ११ माघ २०८१, शुक्रबार
