चीनमा बनेको साइबर ट्रकजस्तो यो ‘मोबाइल एयरक्राफ्ट क्यारियर’ बाटै फ्लाइङ कार लञ्च गर्न सक्ने

काठमाडौं ।

चीनका इन्जिनियरहरूले एउटा अनौठो प्रकारको उड्ने कार सार्वजनिक गरेका छन्, जसलाई जमिनमा साइबरट्रकजस्तो देखिने सवारी साधनमा प्याक गरी लैजान सकिन्छ। यसले यो सवारी साधनलाई मोबाइल एअरक्राफ्ट क्यारियरमा परिणत गर्नेछ।

यो उड्ने भाग इलेक्ट्रिक भर्टिकल टेक-अफ एन्ड ल्याण्डिङ (ईभीटोल) सवारी हो, जसले उड्नका लागि एयरफ्रेममा फैलिएका मोटर र प्रोपेलरहरूलाई प्रयोग गर्छ। यसलाई “डिस्ट्रिब्युटेड इलेक्ट्रिक प्रपल्सन” प्रणाली भनिन्छ।

लाइभसाइन्सका अनुसार यी मोटर र प्रोपेलर साइबरट्रकजस्तो देखिने “मदरशिप” मा राखिएको छ। यसलाई निर्माण गर्ने कम्पनी एक्सपेङ एइरोटका प्रतिनिधिहरूले यसलाई पहिलो प्रकारको सवारी साधन भनेका छन्। यो ८००  भी इन्जिन र प्लेटफर्मसहित आउँछ, जसले १,००० किलोमिटर (६२० माइल) भन्दा बढीको दूरी तय गर्न सक्ने क्षमता दिन्छ।

ईभीटोल उड्ने कारमा ६ वटा रोटर छन् र यो कार्बन फाइबरबाट बनेको छ। यसमा दुई जनालाई एक पटक यात्रा गर्न मिल्छ, र भित्र बस्नेका लागि २७०-डिग्री प्यानोरामिक दृश्य प्रदान गर्छ। यो मेसिन नोभेम्बर २०२४ सम्म निर्माणकै क्रममा थियो, तर कम्पनीले यसलाई पूर्ण रूपमा तयार प्रोटोटाइपको रूपमा लस भेगासमा सीईएस २०२५ मा प्रस्तुत गर्यो।

कम्पनीका प्रतिनिधिहरूका अनुसार यो हवाई सवारीलाई म्यानुअल रूपमा वा स्वचालित रूपमा उड्न मिल्छ र आवश्यक परेमा पाइलटले अन्तिम नियन्त्रण गर्न सक्छ। चाहे सवारी पाइलटद्वारा चलाइएको होस् वा आफैंले उडिरहेको होस्, उडान नियन्त्रण र नेभिगेसन प्रणालीले उडानलाई सधैं स्थिर र सुरक्षित बनाउँछ।

ईभीटोलले जमिनबाट बाहिर आउने प्रक्रियामा आठवटा नियन्त्रण मोड्युल र १४ वटा एक्ट्युएटर (करेन्ट प्रवाह हुँदा बल वा टर्क उत्पादन गर्ने मेसिन) प्रयोग गर्छ। जब ईभीटोल कार जमिनबाट छुट्टिन्छ, यसको रोटरहरू एकाइको बीचबाट फैलिन्छन्। त्यसपछि, रोटरहरू घुम्न सुरु गर्छन् र ईभीटोल उड्न सुरु गर्छ।

नोभेम्बरमा वैज्ञानिकहरूले उड्ने कारको पहिलो सार्वजनिक उडान सम्पन्न गरे। कम्पनीले जमिन र हवाई मोड्युलको पूर्ण रूपमा अलग्गै सञ्चालन र पुनःजोड प्रदर्शन गर्यो।

“जमिन आधारित एअरक्राफ्ट क्यारियर” निर्माण गर्ने कारखानाले वार्षिक १०,००० युनिट उत्पादन क्षमता राख्ने अपेक्षा गरिएको छ। हवाई मोड्युलको उत्पादन २०२५ को तेस्रो त्रैमासिकमा सुरु हुने र डेलिभरी २०२६ मा सुरु हुने अपेक्षा गरिएको छ। कम्पनीका प्रतिनिधिहरूले यो सवारीलाई नयाँ क्षेत्रहरू अन्वेषण गर्न चाहने मनोरञ्जन यात्रीहरूले प्रयोग गर्ने विश्वास गरेका छन्।