काठमाडौं ।
चीनको ग्वाङझाउस्थित पोनी.एआईले आफ्नो रोबोट्याक्सी सेवा हङकङमा सुरु गर्न योजना बनाएको छ। यो कदमले कम्पनीलाई बाइदुजस्ता कम्पनीहरूसँग प्रतिस्पर्धा गर्दै हङकङमा सेवा प्रदान गर्ने दौडमा प्रवेश गराएको छ। पोनी.एआईले आफ्नो गतिविधिहरूलाई विश्वव्यापी रूपमा विस्तार गर्ने लक्ष्य राखेको छ।
नास्दाकमा सूचीकृत पोनी.एआईले हङकङ अन्तर्राष्ट्रिय विमानस्थलमा कर्मचारीहरूको लागि रोबोट्याक्सी आवागमन सेवा प्रदान गरेर आफ्नो अभियान सुरू गर्ने योजना बनाएको छ। यो सेवा विस्तार गर्दै अन्य शहरी क्षेत्रहरूमा पुर्याइने कम्पनीले शुक्रबार राति एक वक्तव्यमा जनाएको छ। यद्यपि सेवाको सुरुवातको समयबारे कुनै जानकारी नदिइएको रोयटर्सले उल्लेख गरेको छ।
चिनियाँ कृत्रिम बुद्धिमता अर्थात् एआई दिग्गज बाइदुले पनि हङकङमा आफ्नो चालकबिनाको ट्याक्सी सेवा सुरु गर्न योजना बनाएको छ। यसका लागि कम्पनीले नोभेम्बरमा उत्तरी लान्ताउमा परीक्षण सञ्चालन गर्न हङकङ सरकारको स्वीकृति पाइसकेको छ।
पोनी.एआईले बेइजिङ, शाङ्हाई, ग्वाङझाउ र शेनझेनमा रोबोट्याक्सी सेवा सञ्चालनका लागि लाइसेन्स प्राप्त गरिसकेको छ। कम्पनीले दक्षिण कोरिया, लक्जेम्बर्ग, मध्यपूर्वका देशहरू र अन्य क्षेत्रमा पनि आफ्नो स्वचालित ड्राइभिङ व्यवसाय विस्तार गर्ने अन्वेषण गरिरहेको छ।
प्रकाशित: २३ पुष २०८१, मंगलवार
