पोको एक्स७ प्रो को स्पेसिफिकेशन बाहिरियो

Technology Khabar १८ पुष २०८१, बिहीबार

काठमाडौं ।

यस हप्ताको सुरुमा, शाओमीको पोकोले जनवरी ९ मा पोको एक्स७ सिरिज अनावरण गर्ने घोषणा गरेको छ। यद्यपि लाइनअपमा कतिवटा फोनहरू समावेश छन् भन्ने बारेमा कम्पनीले उल्लेख नगरेको बताइएको छ।

अब भने लाइनअपमा पोको एक्स७ र पोको एक्स७ प्रो गरी दुई फोनहरू रहने छन् भनि आधिकारिक पुष्टि गरिएको छ। पोकोले ती फोनहरूको स्पेक्सको बारेमा विस्तृत जानकारी उपलब्ध नगराएको भए तापनि चिनियाँ ब्रान्डले एक्स७ प्रोको मूल्य दायरा, प्रोसेसर र ब्याट्री साइजको बारेमा खुलासा गरेको छ।

पोको एक्स७ प्रो मिडियाटेकको डाइमेन्सिटी ८४०० अल्ट्रा एसओसीद्वारा संचालित हुनेछ भने यसमा ६,५५० एमएएच ब्याट्री समावेश गरिनेछ। यसको प्रारम्भिक मूल्य ३०,००० भारतीय रुपैयाँ (३५० अमेरिकी डलर/३४० यूरो) भन्दा कम हुनेछ।

पोकोले आफ्ना स्मार्टफोनहरू पोको एक्स७ र एक्स७ प्रोको डिजाइनहरू पनि खुलासा गरेको छ। पोको एक्स७ मा तीनवटा क्यामराहरूका साथ फक्स लेदर ब्याक प्यानल रहेको छ भने पोको एक्स७ प्रोमा दुईवटा क्यामराहरू समावेश गरिएका छन्।

साथै यसको कालो–पहेंलो डुअल–टोन डिजाइनले रियलमी १० प्रो कोका–कोला संस्करणको सम्झना दिलाउने बताइएको छ भने दुबै स्मार्टफोनका प्राथमिक क्यामराहरूले ओआईएससहितको ५० मेगापिक्सेलको सेन्सरहरू प्रयोग गर्नेछन्।

पोको एक्स७ र पोको एक्स७ प्रो भारतमा फ्लिपकार्ट मार्फत बेचिनेछ। साथै एक्स७ प्रो एलपीडीडीआर५एक्स र्याम, यूएफएस ४.० स्टोरेज, हाइपरओएस २ र ९० वाट चार्जिङको साथ आउने जीएसएमएरिनाले उल्लेख गरेको छ।

प्रकाशित: १८ पुष २०८१, बिहीबार

तपाइको प्रतिक्रिया