यस्तो छ एप्पलले सर्च इन्जिन निर्माण नगर्ने कारणहरू

काठमाडौं ।

गुगलले आईफोनमा डिफल्ट सर्च इन्जिनको रूपमा सेवा गर्ने एप्पल र गुगलको २० बिलियन डलरको सम्झौता छानबिनमा परेको छ। संयुक्त राज्य अमेरिका डीओजेले सर्च इन्डस्ट्री (खोज उद्योग) मा गुगलको प्रभुत्व विरुद्ध आफ्नो मुद्दा जारी राखेको र उक्त आकर्षक एप्पल सम्झौता एक केन्द्र बिन्दु भएको रिपोर्ट गरिएको छ।

यस हप्ता रोयटर्सले देखाएको नयाँ कोर्ट फाइलिङमा, एप्पलका सर्भिसेसका वरिष्ठ उपाध्यक्ष एडी क्युले एप्पल आफैंले आफ्नै सर्च (खोज) इन्जिन किन विकास गर्दैन भनेर उल्लेख गरेका छन्।

गुगल केसमा प्रस्तावित निवारणहरूले एप्पललाई “आफ्नै सर्च इन्जिन विकास गर्ने वा सर्च टेक्स्ट विज्ञापन बजारमा प्रवेश गर्दै” गुगलको प्रभुत्वसँग प्रतिस्पर्धा गर्न नेतृत्व गर्नेछ भन्ने अदालतको विश्वास रहेको छ भनि क्युले बताएका छन्। तथापि, “त्यो धारणा गलत छ” भनि क्युले बताएको उल्लेख गरिएको छ।

एप्पलले किन कहिल्यै सर्च इन्जिन बनाउने छैन भनेर क्युले दिएका कारणहरू यहाँ छन्ः

१. “एप्पल अन्य विकास क्षेत्रहरूमा केन्द्रित छ। सर्च इन्जिन बनाउन अरबौं डलर खर्च हुनुका साथै धेरै वर्ष लाग्ने भएकाले सर्च इन्जिनको विकासका लागि पुँजी लगानी र कर्मचारीहरू दुवै मोड्न पर्ने आवश्यक हुनेछन्।”

२. “ आर्टिफिसियल इन्टेलिजेन्स (कृत्रिम बुद्धिमत्ता) मा हालसालैका र निरन्तर विकासका कारण सर्च द्रुत रूपमा विकसित हुँदैछ। यसले सर्च इन्जिन बनाउनका लागि आवश्यक पर्ने विशाल स्रोतहरू समर्पित गर्न आर्थिक रूपमा जोखिमपूर्ण बनाउँछ।”

३. “एक भायबल (व्यवहार्य) सर्च इन्जिनले लक्षित विज्ञापन बेच्नको लागि प्लेटफर्म निर्माण गर्न आवश्यक पर्दछ, जुन एप्पलको मुख्य व्यवसाय होइन। एप्पलसँग सक्सेसफुल सर्च एडभरटाईसिङ बिजनेस (सफल खोज विज्ञापन व्यवसाय) निर्माण र सञ्चालन गर्न आवश्यक पर्ने विशेष पेशेवरहरूको मात्रा र महत्त्वपूर्ण परिचालन पूर्वाधार छैन।

यद्यपि एप्पलसँग केहि उपयुक्त विज्ञापनहरू छन्, जस्तै एप स्टोर प्लेटफर्ममा, सर्च एडभरटाईसिङ (खोज विज्ञापन) फरक र एप्पलको मुख्य विशेषज्ञता बाहिर छ। सर्च एडभरटाईसिङ बिजनेस (खोज विज्ञापन व्यवसाय) निर्माण गर्नको लागि एप्पलको लामो समयदेखिको गोपनीयता प्रतिबद्धताहरू विरुद्धमा पनि सन्तुलित हुनु आवश्यक छ।”

त्यसैगरी एप्पलले “अनलाइन सर्चमा गुगलको आगामी यूएस एन्टिट्रस्ट ट्रायलमा भाग लिन आग्रह गरेको छ” भनि रोयटर्सले रिपोर्ट गरेको छ।

“गुगलले अब एप्पलको चासोलाई पर्याप्त रूपमा प्रतिनिधित्व गर्न सक्दैनः गुगलले अब आफ्नो व्यवसायिक एकाइहरू तोड्ने व्यापक प्रयासको विरूद्ध रक्षा गर्नुपर्छ” एप्पलले फाइलिङमा बताएको ९टु५म्याकले उल्लेख गरेको छ।