टी-मोबाइलद्वारा स्टारलिंकको ‘डाइरेक्ट टु सेल’ सिधा जडान सेवा परीक्षणका लागि दर्ता खुला

काठमाडौं ।

टी-मोबाइलले स्मार्टफोनमा सिधै स्याटेलाइट जडान गर्ने स्टारलिंक सेवाका लागि परीक्षण (बीटा) दर्ता खुलाएको छ। यो सेवा २०२५ को सुरुवातमा केही नयाँ उपकरणहरूमा अमेरिकी क्षेत्रका अधिकांश “सेलुलर डेड जोनहरू”मा उपलब्ध हुनेछ, जहाँ सफा आकाश देखिन्छ।

टी-मोबाइलका अनुसार यो निःशुल्क बीटा कार्यक्रम सबै टी-मोबाइल ग्राहकहरूको लागि उपलब्ध हुनेछ, जसको उपकरण र पोस्टपेड भ्वाइस प्लान उपयुक्त छ। तर, प्रारम्भिक क्षमतामा सीमा भएकाले प्राथमिकता पहिलो उत्तरदाताहरू (फर्स्ट रिस्पोन्डरहरू) लाई दिइनेछ।

टी-मोबाइलले सेवा क्षमताबारे विवरण नखुलाए पनि बीटा कार्यक्रम क्रमशः थप उपकरणहरूमा सफ्टवेयर अपडेटमार्फत विस्तार गरिने बताएको छ। “स्थान सीमित छन्, तर यो सेवा अधिकांश क्षेत्रमा र अधिकांश समय उपलब्ध हुनेछ,” टी-मोबाइलका प्रवक्ताले बताए।

स्पेसएक्सले स्मार्टफोन सिधा जडान गर्न सक्षम ३०० भन्दा बढी स्टारलिंक स्याटेलाइट प्रक्षेपण गरिसकेको छ। हालै, यसले अमेरिकामा ७,५०० स्याटेलाइटमार्फत सेवा दिन अनुमति पाएको स्पेसन्युज डटकमले उल्लेख गरेको छ।

यी स्याटेलाइटहरूले टी-मोबाइलका रेडियो तरङ्ग प्रयोग गरेर सेल टावरहरूले नछोएको १२,९०,००० वर्ग किलोमिटर जमिनमा उपकरणहरूसँग जडान गर्नेछन्।

एप्पलले २०२२ मा ग्लोबलस्टारको स्याटेलाइट प्रयोग गरेर आईफोनका लागि स्पेस जडान सन्देश सेवा सुरु गरेको थियो। तर टी-मोबाइलका अनुसार, स्टारलिंक जडानले प्रयोगकर्तालाई सिग्नल खोज्न फोन आकासतिर सोझ्याउनुपर्ने आवश्यकता पर्दैन।

टी-मोबाइलसँग जापानको केडीडीआई, अष्ट्रेलियाको अप्टस, न्यूजिल्याण्डको वनएनजी, स्विजरल्याण्डको सल्ट, चिली र पेरुको एन्टेल, तथा क्यानडाको रोजर्सजस्ता टेलिकम कम्पनीहरूसँग स्टारलिंक रोमिङ सम्झौता छ। तर अमेरिकाबाहिर यो सेवा कहिले उपलब्ध हुनेछ भन्ने खुलाइएको छैन।

बीटा परीक्षणको अवधि प्रयोगकर्ताहरूको प्रतिक्रिया र फीडब्याकमा भर पर्नेछ।

स्पेसन्युज डटकमका अनुसार संघीय सञ्चार आयोग (एफसीसी) ले यसलाई अन्य नेटवर्कहरूसँग बाधा नपर्ने गरी अनुमोदन दिएको छ। तर एफसीसीले स्टारलिंक स्याटेलाइटहरूको रेडियो उत्सर्जन शक्ति बढाउने अनुमति दिनबारे निर्णय गर्न बाँकी छ। यो शक्तिवृद्धि स्पेसएक्सका अनुसार भ्वाइस कल र उच्च ब्यान्डविथ आवश्यकताका लागि जरुरी छ।

यसैबीच, अमेरिकी टेलिकम कम्पनीहरू एटीएण्डटी र भेरिजोन पनि एएसटी स्पेसमोबाइलसँग साझेदारीमा आफ्नै स्मार्टफोन सिधा जडान सेवाहरू परीक्षण गर्न एफसीसीको अनुमति मागिरहेका छन्। एएसटी स्पेसमोबाइलले आफ्नो पहिलो पाँच व्यावसायिक स्याटेलाइटहरू यसै सेप्टेम्बरमा स्पेसएक्स फाल्कन ९ द्वारा प्रक्षेपण गरिसकेको छ।