आफ्नो नयाँ एआई मोडलले सबै मौसम पूर्वानुमान प्रणालीलाई पाखा लगाउने गुगलको दावी

काठमाडौं ।

गुगलले आफ्नो नयाँ एआई मोडेल जेनकास्ट विश्वकै उत्कृष्ट मौसम पूर्वानुमान प्रणालीलाई उछिनेको दाबी गरेको छ। गुगलको डीपमाइन्ड टोलीले यस हप्ता यो एआई मोडेल सार्वजनिक गरेको हो।

नेचर पत्रिकामा प्रकाशित पेपर अनुसार, जेनकास्ट ले युरोपियन सेन्टर फर मिडियम-रेन्ज वेदर फोरकास्ट्स (ईसीएमडब्लूएफ) को ईएनएस प्रणालीलाई उछिनेको छ। ईएनएस हालसम्म विश्वकै अग्रणी पूर्वानुमान प्रणाली मानिने टेकक्रञ्चले उल्लेख गरेको छ।

डीपमाइन्ड टोलीका अनुसार जेनकास्ट एक उन्नत प्रणाली हो जसले भविष्यको मौसमका विभिन्न सम्भाव्य परिदृश्यहरू प्रतिनिधित्व गर्न ५० वा सोभन्दा बढी पूर्वानुमानहरू समेट्छ। यो पहिलेको “डिटर्मिनिस्टिक” मोडेलभन्दा फरक छ, जसले केवल एउटा निश्चित अनुमान दिन्थ्यो। यसले भविष्यको मौसमको जटिल सम्भाव्यता वितरण तयार गर्न सक्षम बनाउँछ।

जेनकास्ट लाई २०१८ सम्मको मौसम डेटा प्रयोग गरेर प्रशिक्षण दिइएको थियो। यसको प्रदर्शन २०१९ का पूर्वानुमानसँग तुलना गर्दा, जेनकास्ट ९७.२ प्रतिशत समय अधिक सही सावित भयो।

गुगलले जेनकास्टलाई आफ्नो एआई-आधारित मौसम मोडेलहरूको सेटमा समावेश गरेको छ। यसलाई गुगल सर्च र म्याप्समा पनि समाहित गर्न थालिएको छ। साथै गुगलले जेनकास्ट का वास्तविक-समय र ऐतिहासिक पूर्वानुमानहरू सार्वजनिक गर्ने योजना बनाएको छ, जसले अनुसन्धानकर्ता र अन्य प्रयोगकर्ताहरूलाई आफ्ना मोडेलहरूमा प्रयोग गर्न मद्दत गर्ने टेकक्रञ्चले उल्लेख गरेको छ।