प्रतिलिपि अधिकार उल्लङ्घन गरेको भन्दै क्यानडाका मिडिया कम्पनीहरुद्वारा ओपनएआई विरुद्ध मुद्दा

काठमाडौं ।

पाँचवटा क्यानाडेली समाचार मिडिया कम्पनीहरूले शुक्रबार  च्याटजीपीटीका मालिक ओपनएआईविरुद्ध मुद्दा दायर गरे। उनीहरूले ओपनएआईलाई बारम्बार प्रतिलिपि अधिकार  र अनलाइन नियमहरू उल्लङ्घन गरेको आरोप लगाए।

यो मुद्दा लेखकहरू, दृश्य कलाकारहरू, संगीत प्रकाशकहरू, र अन्य प्रतिलिपि अधिकार मालिकहरूले ओपनएआई र अन्य प्रविधि कम्पनीहरूविरुद्ध गरेका मुद्दाहरूको लहरकै हिस्सा हो। यी मुद्दाहरूमा जेनेरेटिभ एआई प्रणालीहरू प्रशिक्षणका लागि प्रयोग गरिएका डाटाबारे प्रश्न उठाइएको छ।

ओपनएआईको मुख्य समर्थक माइक्रोसफ्ट हो। टोर्स्टार, पोस्टमिडिया, द ग्लोब एण्ड मेल, द क्यानेडियन प्रेस र सीबीसी/रेडियो-क्यानडाले जारी गरेको विज्ञप्तिमा ओपनएआईले अनुमति नलिई र सामग्रीका मालिकहरूलाई क्षतिपूर्ति नदिई आफ्ना उत्पादन विकासका लागि ठूलो मात्रामा सामग्री सङ्कलन गरेको आरोप लगाइएको छ।

“पत्रकारिता जनहितका लागि हो। ओपनएआईले अन्य कम्पनीहरूको पत्रकारिता आफ्ना व्यापारिक फाइदाका लागि प्रयोग गर्नु गैरकानूनी हो,” विज्ञप्तिमा भनिएको छ।

नोभेम्बर ७ मा, न्यूयोर्कको संघीय न्यायाधीशले र स्टोरी र अल्टरनेटजस्ता समाचार संस्थाहरूका लेखहरू दुरुपयोग गरेको भन्दै ओपनएआईविरुद्ध दायर मुद्दा खारेज गरेका थिए।

रोयटर्सका अनुसार ओन्टारियोको सुपेरियर कोर्टमा दायर ८४ पृष्ठ लामो मुद्दामा पाँचवटा क्यानाडेली कम्पनीहरूले ओपनएआईबाट क्षतिपूर्ति माग गरेका छन् र उनीहरूको सामग्री अनुमति बिना प्रयोग गर्न रोक लगाउन स्थायी आदेश जारी गर्न माग गरेका छन्।

“सूचना कानुनी तरिकाले प्राप्त गर्न खोज्नुभन्दा ओपनएआईले निर्लज्ज रूपमा समाचार मिडिया कम्पनीहरूको बहुमूल्य बौद्धिक सम्पत्ति दुरुपयोग गरेको र आफ्ना व्यापारिक फाइदाका लागि प्रयोग गरेको छ,” मुद्दामा भनिएको छ।

“ओपनएआईले कहिल्यै पनि समाचार मिडिया कम्पनीहरूको सामग्रीको प्रयोगबापत अनुमति वा कुनै किसिमको भुक्तानी दिएको छैन।”

यसको जवाफमा ओपनएआईले आफ्नो मोडलहरू सार्वजनिक रूपमा उपलब्ध डाटामा आधारित रहेको र यो निष्पक्ष प्रयोग र अन्तर्राष्ट्रिय प्रतिलिपि अधिकार सिद्धान्तहरूसँग मेल खाने दावी गरेको छ।

“हामी समाचार प्रकाशकहरूसँग नजिकबाट सहकार्य गर्छौं, जसमा च्याटजीपीटी सर्चमा सामग्री देखाउने, श्रेय दिनेजस्ता काम समावेश छन्। उनीहरूलाई सजिलै विकल्प उपलब्ध गराउँछौं कि सामग्री हटाउन चाहन्छन् भने,” ओपनएआईका प्रवक्ताले इमेलमार्फत भने।