सन् २०२४ मा साढे ५ अर्ब मानिसमा इन्टरनेटको पहुँच भएको अनुमान, शहरी र ग्रामीण बिचको विभेद उस्तै

काठमाडौं ।

इन्टरनेशनल टेलिकम्युनिकेसन युनियन (आईटीयू) ले २०२४ मा पहिलो पटक २२ करोड ७० लाख नयाँ व्यक्ति इन्टरनेटमा जोडिएसँगै कूल जडान भएका व्यक्तिको संख्या ५ अर्ब ५० करोड पुगेको बताएको छ।

आईटीयूको पछिल्लो तथ्याङ्क र तथ्याङ्क प्रतिवेदन अनुसार २०२३ को संशोधित अनुमानबाट २२७ मिलियन प्रयोगकर्ता थप्दै यस वर्ष इन्टरनेट पहुँच भएका व्यक्तिहरूको संख्या साढे ५ अर्ब पुगेको हो।

विश्वव्यापी जनसंख्याको ६८ प्रतिशतले अब अनलाइन सेवाहरू प्रयोग गर्ने तथ्याङ्कले देखाउँछ। उच्च विकसित अर्थतन्त्रमा यो संख्या ९३ प्रतिशत छ, तर न्यून आय भएका देशहरूमा यो घटेर २७ प्रतिशतमा झरेको छ।

आईटीयूका अनुसार अझैपनि विश्वको जनसंख्याको एक तिहाइ (२.६ अर्ब) अफलाइनमा छन र यसले “जिद्दी डिजिटल विभाजन जारी छ,” भन्ने देखाउँछ।

सन् २०२३ मा, कुल २.८ अर्ब कनेक्सनमा नरहेका मानिसहरू थिए, जुन विश्व जनसंख्याको लगभग ३५ प्रतिशत बराबर हो।

आईटीयूका महासचिव डोरिन बोगदान-मार्टिनले यो तथ्याङ्कले “उच्च आय र न्यून आय भएका देशहरू बीचको दुई डिजिटल वास्तविकताको कथा” लाई उजागर गरेको बताईन्।

“महत्वपूर्ण कनेक्टिभिटी सूचकहरूमा कडा अन्तरले सबैभन्दा कमजोर मानिसहरूलाई सूचना, शिक्षा र रोजगारीका अवसरहरूमा अनलाइन पहुँचबाट टाढा राखेको छ। हाम्रो अन्तरसम्बन्धित संसारमा साँचो प्रगतिमा हामी कति छिटो अगाडि बढ्छौं भन्ने कुरामा मात्र होइन, तर सबैजना सँगै अगाडि बढ्ने कुरा सुनिश्चित गर्ने बारे यो रिपोर्ट एक रिमाइन्डर हो,” बोगदान-मार्टिनले थपिन्।

प्रतिवेदनले सन् २०२४ मा ६५ प्रतिशत महिलाको तुलनामा ७० प्रतिशत पुरुषले इन्टरनेट प्रयोग गरेको पत्ता लगाएको छ, जुन करिब १८ करोड ९० लाखले अन्तर छ। तर, लैङ्गिक समानता हासिल गर्ने दिशामा प्रगति भइरहेको छ।

कम आय भएका देशहरूमा स्थिर ब्रोडब्यान्डको लागत अब औसत मासिक आम्दानीको झन्डै एक तिहाइ बराबर हुने गरी किफायती क्षमतामा सुधार भइरहेको छ। १० वर्षभन्दा माथिका पाँचमध्ये चार जनासँग मोबाइल फोन छ, तर यो उच्च आय भएका देशहरूमा बढी प्रचलित छ, जहाँ १० वर्षभन्दा माथिका ९५ प्रतिशतसँग मोबाइल फोन छ भने कम आय भएका बजारहरूमा ५६ प्रतिशतसँग मात्रै छ।

तथ्यांकअनुसार, सहरी र ग्रामीण बासिन्दाहरू बीच थप महत्त्वपूर्ण विभाजन अवस्थित छ, ग्रामीण बासिन्दाहरूको ४८ प्रतिशतको तुलनामा ८३ प्रतिशत सहरी बासिन्दाहरूले इन्टरनेट प्रयोग गर्ने गर्दछन्। सम्पर्कविहीन अर्थात कनेक्सन नभएका २.६ अर्ब मानिसमध्ये १.८ अर्ब मानिसहरु ग्रामीण क्षेत्रमा बस्छन्।

फाइभजीको कभरेज यस वर्ष विश्वव्यापी जनसंख्याको आधा (५१ प्रतिशत) मा पुग्ने अनुमान गरिएको छ, तर उच्च र न्यून आय भएका देशहरू बीच “महत्वपूर्ण असमानताहरू” कायम छन्। उच्च आय भएका देशहरूमा ८४ प्रतिशत मानिसहरू ५जीद्वारा कभर छन् भने, केवल ४ प्रतिशत न्यून आय भएका देशहरूमा ५जीको पहुँच छ।

उच्च आय भएका देशहरूमा (१६.२ जीबी) प्रति सदस्यता औसत मासिक मोबाइल ब्रोडब्यान्ड ट्राफिक कम आय भएका अर्थतन्त्रहरू (२ जीबी) भन्दा आठ गुणा बढी रहेको आईटीयूले जनाएको छ।