गढीमाई मेलामा ड्रोन उडाउन अनुमति लिनुपर्ने, अनुमति बिना उडाउनेलाई कानुन अनुसार कारबाही गरिने

काठमाडौं ।

जिल्ला प्रशासन कार्यालय बाराले प्रसिद्ध गढीमाई मेलामा अनुमतिबिना ड्रोन उडाउन निषेध गरेको छ। कार्यालयले शुक्रबार एक विज्ञप्ति जारी गरी यस्तो जानकारी दिएको हो।

‘ड्रोन जनित मानवरहित हवाई उपकरण उडान सम्बन्धी कार्यविधि, २०७५ बमोजिम कुनै व्यक्ति वा संस्थाले ड्रोन क्यामेरा उडान गर्ने भएमा जिल्ला प्रशासन कार्यालयबाट अनुमति लिई ड्रोन क्यामेरा उडान गर्ने सक्ने प्रावधान रहेको छ’, विज्ञप्तिमा उल्लेख छ, ‘यस बारा जिल्ला महागढीमाई नगरपालिका वडा नं. १ बरियारपुरमा अवस्थित श्री गढीमाई मन्दिरमा मिति २०८१ मंसिर १ गते देखी ऐ. मसान्त सम्म लाग्ने पञ्चवर्षिय गढीमाई मेला, २०८१ लाई लक्षित गरी कुनै पनि व्यक्ति, संघ संस्थाले यस कार्यालयको अनुमति बेगर ड्रोन क्यामेरा उडान गर्न पाइने छैन।’

यो सूचनाको अवज्ञा गरी कोही कसैले ड्रोन क्यामेरा उडान गरेको देखिएमा वा पाइएमा उक्त ड्रोन क्यामेरा जफत गरी सम्बन्धित ड्रोन क्यामेराका धनी उडानमा संलग्न व्यक्तिलाई प्रचलित कानुन बमोजिम कारबाही हुने व्यहोरा समेत कार्यालयले सबैमा सूचित गरेको छ।