इम्पल्स स्पेसले गर्यो ३ ओटा फाल्कन ९ प्रक्षेपण किन्ने सम्झौता

काठमाडौं ।

इम्पल्स स्पेसले आफ्नो हेलियस ट्रान्सफर भेइकल को लागि तीनवटा फाल्कन ९ प्रक्षेपणको सम्झौता गरेको छ जसमा पहिलो मिशन सन् २०२६ मा सुरू हुनेछ र एउटा मिशन स्पेस फोर्सका लागि हुनेछ।

इम्पल्स स्पेसले नोभेम्बर १४ मा उसले स्पेसएक्ससँग फाल्कन ९ प्रक्षेपणहरूको सम्झौता गरेको घोषणा गर्यो। प्रत्येक प्रक्षेपणले कम्पनीको गत जनवरीमा परिचित गराइएको उच्च-ऊर्जा किक स्टेज- हेलियस ट्रान्सफर भेइकललाई बोक्नेछ। यसले कक्षहरू बीच पेलोडहरू छिटो र प्रभावकारी रूपमा सार्न मद्दत गर्ने स्पेसन्युज डटकमले उल्लेख गरेको छ।

पहिलो प्रक्षेपण सन् २०२६ को मध्यतिर योजना गरिएको छ र यो हेलियसको पहिलो उडान हुनेछ। यसमा हेलियस ट्रान्सफर भेइकलले कम्पनीको सानो मिरा भेइकललाई लो अर्थ अर्बिटबाट भू-स्थानान्तरण कक्ष (जीटीओ) सम्म पुर्‍याउनेछ। यस मिशनलाई भिक्टस सर्गो भनिन्छ जुन स्पेस फोर्स र डिफेन्स इनोभेशन युनिटका लागि हो।

इम्पल्स स्पेसले भिक्टस सर्गो र अर्को मिशन भिक्टस सालोका लागि अक्टोबर ३ मा ३४.५ मिलियन डलरको सम्झौता प्राप्त गरेको थियो। बाँकी दुई हेलियस प्रक्षेपणहरूको तालिका र पेलोडहरू पछि निर्धारण गरिनेछन्।

इम्पल्स स्पेसका अध्यक्ष र प्रमुख संचालन अधिकृत इरिक रोमोका अनुसार “यी प्रक्षेपणहरू सुरक्षित गर्नुले हेलियसको सम्पूर्ण क्षमताहरू प्रदर्शन गर्न हामीलाई अवसर प्रदान गर्छ। उच्च ऊर्जा कक्षहरूमा यानहरू छिटो र किफायती रूपमा पुर्‍याउनुले व्यावसायिक सञ्चार अपरेटरहरू र भिक्टस सर्गो जस्ता राष्ट्रिय सुरक्षाका मिशनहरूका लागि नयाँ सम्भावनाहरू ल्याउनेछ।”

हेलियसलाई डेनेब नामको तरल अक्सिजन र तरल मिथेन इन्जिनद्वारा चलाइएको छ, जसले १५ हजार पाउण्ड-बल उत्पन्न गर्छ। नोभेम्बर १४ मा इम्पल्स स्पेसले डेनेबको विकासात्मक संस्करण प्रस्तुत गर्यो र यसलाई “सबैभन्दा उच्च-क्षमता भएका तरल अक्सिजन/तरल मेथेन इन्जिनहरूमध्ये एक” भन्यो। कम्पनीले छिट्टै यसको परीक्षण सुरू गरिने जनाएको छ।

कम्तीमा पहिलो प्रक्षेपण फ्लोरिडाबाट हुनेछ जहाँ हेलियसलाई प्रक्षेपणअघि प्रोपेल्यान्ट भरिने कम्पनीले आफ्नो विज्ञप्तिमा उल्लेख गरेको छ। स्पेएक्ससँग लञ्च कम्प्लेक्स ३९ए मा तरल अक्सिजन र मेथेन भरिने सुविधा छ, जुन यसअघि आईएम -१ चन्द्रमा मिसनका लागि प्रयोग गरिएको थियो।

इम्पल्स स्पेसले अक्टोबर १ मा १५० मिलियन डलरको सिरिज बी लगानी घोषणा गरेको थियो जसलाई हेलियस र मिरा परियोजनाहरूका लागि प्रयोग गरिनेछ।