रुकुमको मुसीकोटमा राष्ट्रिय परिचयपत्र बनाउनेको भिड

काठमाडौं ।

जिल्ला प्रशासन कार्यालय रुकुम पश्चिममा पछिल्ला केही दिनदेखि सेवाग्राहीको भिड लाग्ने गरेको छ। दसैँ, तिहार सुरु भएसँगै सेवाग्राहीको सङ्ख्या बढेपछि केही दिनयता भिड नै लाग्ने गरेको छ। जिल्ला प्रशासन कार्यालयका अनुसार नागरिकता, राष्ट्रिय परिचयपत्र र राहदानी बनाउन आउने सेवाग्राहीको सख्यामा उल्लेख्य वृद्धि भएको छ।

यसका साथै अन्य सिफारिसका लागि समेत आउने सेवाग्राडौको सङ्ख्या पनि बढेको सो कार्यालयले जनाएको छ । सेवाग्राहीको चाप बढेपछि अन्य सरकारी कार्यालयको जनशक्तिसमेत प्रशासनमा थप गरिएको छ।

सहायक प्रमुख जिल्ला अधिकारी विनोद रेग्मीका अनुसार कार्यालय समय सुरु हुनुभन्दा पहिल्यै सेवाग्राही कार्यालयको ढोकामा आइसकेका हुन्छन्। मगलबार मात्र कार्यालयबाट २२ वटा नयाँ र ३१ वटा प्रतिलिपि गरेर १२३ वटा नागरिकता जारी गरिएका छन्।

चाडपर्व सुरु हुनुभन्दा पहिला दैनिक १५ देखि २० वटा नागरिकता जारी हुने गरेको प्रशासनको भनाइ छ। सोमबार पनि ७५ वटा नयाँ र ३१ वटा प्रतिलिपि गरेर १०६ वटा नागरिकता जारी भएका थिए।

मङ्गलबार ६१ जनाको राष्ट्रिय परिचयपत्र दर्ता गरिएको छ भने १० वटा वितरण गरिएको छ। सहायक प्रमुख जिल्ला अधिकारी रेग्मीले एकै दिन ४६ जनाको राहदानी सिफारिस गरिएको र आठ वटा वितरण गरिएको जनाए।

जिल्लाभन्दा बाहिर गएकाहरू चाडपर्वको बेला घर आएको मौकामा नागरिकता, राष्ट्रिय परिचयपत्र, राहदानीलगायत अन्य सिफारिस बनाउने भएकाले भिड लाग्ने गरेको सहायक प्रजिअ रेग्मीले बताए। सेवाग्राहीको चाप बढेपछि जिल्ला प्रशासन कार्यालयले अन्य कार्यालयबाट कर्मचारी मगाएर जनशक्ति थप गरेको छ।

कारागार कार्यालयबाट र निर्वाचन कार्यालयबाट एक/एक जना कर्मचारी मगाएर काममा लगाइएको छ भने प्रशासनकै अन्य शाखाका कर्मचारीलाई समेत नागरिकता शात्वामा खटाइएको छ।

यसका साथै भिड व्यवस्थापन गर्न जिल्ला प्रहरी कार्यालयबाट सुरक्षाकर्मीसमेत थप गरिएको छ। सेवाग्राहीको चाप अझै बढेमा जिल्ला हुलाकलगायत कामको चाप कम हुने अन्य कार्यालयबाट कर्मचारी थप गरिने प्रशासनले जनाएको छ।

आजको गोरखापत्रबाट