Technology Khabar २५ कार्तिक २०८१, आईतवार
काठमाडौं ।
मधेश प्रदेशका मुख्यमन्त्री सतीशकुमार सिंहले मधेश प्रदेश तथा मुलुकका अन्य ठाउँबाट बर्सेनि ठूलो सख्यामा युवाहरू रोजगारीका लागि पलायन हुने गरेकोले स्वदेशमै रोजगारीका अवसर उपलब्ध गराउन सरकारले ल्याएको स्टार्टअप कार्यक्रम सहयोगी हुने बताएका छन्।
मुख्यमन्त्री सिंहले शनिबार वीरगन्जमा मधेश प्रदेश उद्योग बाणिज्य सय र औद्योगिक व्यवसाय विकास प्रतिष्ठानले सयुक्त रूपमा आयोजना गरेको स्टार्टअप उद्यमी (आन्टरप्रेनर्स) सम्मेलन २०२४ को उद्घाटन गर्दै यस्तो बताएका हुन्।
संघीय सरकारले ल्याएको स्टार्टअप कार्यक्रम समय सान्दर्भिक रहेको र यसले कामको खोजीमा बिदेसिने युवालाई केही हदसम्म रोजागारीका अवसर स्वदेशमै प्रदान गर्ने भएकाले यसमा मधेश प्रदेशको पूर्ण साथ र सहयोग रहने बताए।
उनले यस्ता कार्यक्रममा सबैको साथ र सहयोगमा सफल हुने भएकोले मुलुकका उद्योगपति व्यापारोको पनि महत्त्वपूर्ण योगदानको आवश्यकता रहेको बताए।
संघीय सरकारले ल्याएको स्टार्टअप कार्यक्रम सफल भए सोय सरकारसँग हातेमालो गर्दै प्रदेश सरकारले पनि कार्यक्रममा लगानी गर्ने स्पष्ट पारे। मुख्यमन्त्री सिंहले ठूलो सख्यामा पुरुष पलायन हुँदा महिला घरमा मोबाइल तथा टेलिभिजन हेरेर बस्ने गरेकोमा स्टार्टअप कार्यक्रमसँग महिलालाई जोडेर लघु उद्योग तथा घरेलु हस्तकला सामानको उत्पादनमा संलग्न गराए महिला उद्यमीले पनि काम तथा रोजगारीको अबसर पाउने बताए।
मधेश प्रदेशका उद्योग, वाणिज्य तथा पर्यटनमन्त्री सकिल अलि मियाँले स्टार्टअपले सबैलाई समान अवसर प्रदान गर्ने भएकाले प्रदेशका युवा शक्तिलाई अगाडि बढ्न मद्दत मिल्ने बताए।
वीरगन्ज महानगरपालिकाका प्रमुख राजेशमान सिंहले स्टार्ट अप कार्यक्रम मधेश प्रदेशका लागि उर्वर भूमिका रूपमा आएकोले यसबाट युवा उद्यमीले बढीभन्दा बढी सदुपयोग गरी लाभ लिनुपर्ने बताए। उनले चुनौतीलाई स्वीकार गरेर अघि नबढेसम्म अवसर पाउन नसकिने भएकाले अगाडि बढ्न युवालाई प्रेरित गरे।
गुगल इन्डियाका स्टार्टअप प्रमुख अपूर्व चमरियाले स्टार्टअप कार्यक्रमले युवा पुस्तालाई प्रोत्साहन गर्न तथा ऊर्जावान् बनाउनुका साथै आफूले सिकेको सिपको अधिकतम उपभोग गरी लाभ लिन सकिने भएकाले सबै थोक भए पनि पैसा नभएकाका लागि स्टार्टअप निकै उपयोगी भएको बताए।
उनले कुनै पनि मुलुकको सरकारका सहयोग र साथबिना यस्ता कार्यक्रम सफल नहुने भएकोले सरकारको साथ लिएर मुलुकलाई सुहाउँदो र मुलुकले चाहे जतिको व्यापारको वर्गीकरण गरेर स्टार्टअप कार्यक्रमलाई अगाडि बढाउन सुझाव दिए।
कार्यक्रममा उद्योगी व्यवसाय विकास प्रतिष्ठानका कार्यकारी निर्देशक उमेशकुमार गुप्ताले सरकारले स्टार्टअप कार्यक्रमका लागि आर्थिक वर्ष २०८०/८१ मा एक अर्ब रुपियाँ विनियोजन गरेकोमा प्रतिष्ठानले स्टार्टअप उद्यमकर्जा वितरण गर्न आवेदन माग गर्दा पाँच हजार एक सय ६१ उद्यमीले परियोजनामा प्रस्ताव पेस गरेको जानकारी दिए।
छनोटमा परेका पाँच सयदेखि ६ सय जनालाई तीन प्रतिशतको ब्याजमा पाँच वर्षका लागि २५ लाख रुपियाँ माघको अन्तिम सातादेखि वितरण गर्ने जानकारी दिए।
मधेश प्रदेश उद्योग बाणिज्य सक्ष्यका अध्यक्ष अशोक टेमानीले अध्यक्षता गर्दै विदेशमा गए मात्र रोजगारी पाउने भ्रम तोइन तथा मधेश प्रदेशका युवायुवतीलाई अवसरको वातावरण मिलाउन कार्यक्रमको आयोजना औद्योगिक र व्यापारी नगरीका रूपमा मुलुकभर पहिचान बनाएको वीरगन्जबाट कार्यक्रमको सुरुवात गरिएको बताए।
कार्यक्रममा मधेश प्रदेश नीति तथा योजना आयोगका उपाध्यक्ष सोहन साह, उद्योग वाणिज्य महासघका उपाध्यक्ष हेमराज ढकाल, बीरगन्ज उद्योग बाणिज्य सक्यका उपाध्यक्ष हरि गौतम, स्टार्टअप समिति मधेश प्रदेशका अध्यक्ष अनुप अग्रवाल र अशोक लाठले कार्यक्रमको उद्देश्यका बारेमा लगभग ४५० युवा उद्यमी र क्याम्पसका विद्यार्थीलाई जानकारी दिइएको थियो।
आजको गोरखापत्रबाट
प्रकाशित: २५ कार्तिक २०८१, आईतवार
