निन्टेन्डो स्विच कन्सोलको सफ्टवेयर उत्तराधिकारी डिभाइसमा पनि खेल्न सकिने

काठमाडौं ।

निन्टेन्डो स्विच कन्सोलका सफ्टवेयरहरु उत्तराधिकारी डिभाइसमा पनि खेल्न सकिने भएको छ। यो जानकारी कम्पनीका अध्यक्ष शुन्तारो फुरुकावाले बुधबार दिएको रोयटर्सले उल्लेख गरेको छ।

क्योटोमा आधारित यो गेमिङ कम्पनीले आगामी उत्तराधिकारी डिभाइसको घोषणा आर्थिक वर्ष २०२५ को मार्चमा समाप्त हुने क्रममा गर्ने योजना बनाएको छ तर थप जानकारी भने दिएको छैन।

“हाल निन्टेन्डो स्विच धेरै ग्राहकहरु द्वारा खेलिंदैछ त्यसैले हामीले स्विच सफ्टवेयरलाई उत्तराधिकारी मोडलमा पनि खेल्न मिल्ने बनाउनु उपयुक्त ठानेका छौं,” फुरुकावाले भने। “ग्राहकहरु आफूसँग भएका खेलहरु खेल्न र बजारमा उपलब्ध खेलहरुको लाइनअपबाट नयाँ शीर्षक छान्न सक्षम हुनेछन्,” फुरुकावा ले व्यवस्थापन नीति ब्रिफिङमा भने।

रोयटर्सका अनुसार यसरी पछिल्लो पुस्ताको डिभाइसमा पनि स्विचको खेलहरु खेल्न मिल्दा ग्राहकहरुलाई नयाँ डिभाइसमा जाने प्रोत्साहन मिल्न सक्छ र पहिलेका सफ्टवेयरहरुको आकर्षण अझ बढ्न सक्छ।

“यो ठूलो आश्चर्यको कुरा होइन तर नयाँ डिभाइस हालको जस्तै हुने भन्ने कुरा सायद अर्को संकेत हुन सक्छ,” कान्तान गेम्स सल्लाहकार कम्पनीका संस्थापक सेर्कान तोतोले भने।

निन्टेन्डोले स्विचका लागि १.३ अर्बभन्दा बढी सफ्टवेयर युनिट बेचेको छ, जुन आठौं वर्षमा छ र यसको १४५ मिलियन भन्दा बढी युनिटहरु छन्।

यस क्योटो-आधारित गेमिङ कम्पनीले सफलतापूर्वक घर र पोर्टेबल दुवै रूपमा स्विचको जीवनचक्रलाई हिट खेल र हार्डवेयर रिफ्रेसहरुसँग विस्तार गर्दै आएको छ। हार्डवेयर बिक्रीमा भने कमी आएको छ, जसका कारण निन्टेन्डोले मंगलबार वर्षको अन्त्यको किनमेल सिजन अगाडि आफ्नो बर्सेनि स्विच बिक्री अनुमानलाई ७% घटाएर १२.५ मिलियन युनिट बनाएको छ।