स्पेसएक्सद्वारा २३ ओटा नयाँ स्टारलिंक इन्टरनेट भूउपग्रहहरू प्रक्षेपण

काठमाडौं ।

स्पेसएक्सले हिजो अक्टोबर २३ का दिन फ्लोरिडाको स्पेस कोस्टबाट २३ वटा नयाँ स्टारलिंक इन्टरनेट उपग्रहहरू प्रक्षेपण गरेको छ। फाल्कन ९ रकेट २३ स्टारलिंक यानहरू सहित केप क्यानाभेरल स्पेस फोर्स स्टेशनबाट उडेको हो। स्पेसएक्सले यो प्रक्षेपण सोमबार (अक्टोबर २२) गर्न खोजेको थियो तर मौसम समस्याका कारण स्थगित गरेर त्यसको ठिक भोलिपल्ट प्रक्षेपण गरेको हो।

फाल्कन ९ को पहिलो चरण प्रक्षेपण भएको करिब आठ मिनेटपछि सफलतापूर्वक पृथ्वीमा फर्कियो र अटलान्टिक महासागरमा रहेको स्पेसएक्स को ड्रोन जहाज “A Shortfall of Gravitas” मा अवतरण गर्‍यो।

यो बुस्टरको १८ औं प्रक्षेपण र अवतरण थियो र स्टारलिंक मिशनको लागि १३ औं पटक प्रयोग गरिएको स्पेस डटकमले उल्लेख गरेको छ।

फाल्कन ९ को माथिल्लो चरणले उपग्रहहरू पृथ्वीको नजिकको कक्ष अर्थात् लो अर्थ अर्बिटमा पुर्‍याउने काम जारी राख्यो र यदि सबै योजना अनुसार भयो भने प्रक्षेपण भएको ६५ मिनेटपछि ती उपग्रहहरू कक्षमा तैनाथ हुने बताइएको छ।

हाल स्पेसएक्सले लो अर्थ अर्बिटमा ६,४०० भन्दा बढी स्टारलिंक उपग्रहहरू सञ्चालन गरिरहेको छ जसको जानकारी खगोलभौतिक विज्ञ र उपग्रह ट्र्याकर जोनाथन म्याक्डोवेलले दिएका छन्।

स्पेस डटकमका अनुसार हिजोको प्रक्षेपणले देखाएजस्तै यो संख्या बढ्दै गएको छ। स्पेसएक्सले सन् २०२४ मा हालसम्म ९९ वटा फाल्कन ९ मिशनहरू सम्पन्न गरिसकेको छ र तीमध्ये दुई तिहाइभन्दा बढी स्टारलिंक मेगाकन्स्टलेसन निर्माणमा समर्पित भएका छन्।