भेराइजनको तेस्रो त्रैमासिकको आम्दानी अनुमानभन्दा कम

काठमाडौं ।

केही ग्राहकहरूले नयाँ फोन अपग्रेड गरेका कारण भेराइजनले तेस्रो त्रैमासिकको आम्दानी अनुमानभन्दा कम भएको रिपोर्ट गरेको छ। यसले कम्पनीको मजबुत वायरलेस ग्राहक वृद्धिलाई छायामा पार्दै कम्पनीका शेयरहरू प्रि-मार्केट ट्रेडिङमा ३% ले घटायो।

रोयटर्सका अनुसार अमेरिकी दूरसञ्चार कम्पनीले फोन अपग्रेडको मात्रा १०% ले घटेको बताएको छ जसको कारण उच्च ब्याज दरहरूले ग्राहकहरूलाई खर्च घटाउन बाध्य बनायो। यसले वायरलेस उपकरण बिक्रीलाई करिब ९% ले घटायो।

कम्पनीको कुल आम्दानी ३.३३ अर्ब डलर रह्यो जुन विश्लेषकहरूको३३.४३ अर्ब डलरको अनुमानभन्दा थोरै कम भयो। तर भेराइजनले सेप्टेम्बर त्रैमासिकमा २३९,००० नयाँ मासिक बिल तिर्ने वायरलेस फोन ग्राहकहरू थप्न सफल भयो जुन फ्याक्टसेटका अनुसार २१८,१०० को अपेक्षाभन्दा बढी रहेको उल्लेख गरिएको छ।

डिज्नी+, हुलु र म्याक्स जस्ता स्ट्रिमिङ सुविधा समावेश रहेको कम्पनीको माइप्लानको बढ्दो उपयोगले प्रतिस्पर्धी अमेरिकी दूरसञ्चार बजारमा भेराइजनलाई बलियो राख्न मद्दत गरेको छ।

अमेरिकी वायरलेस बजार लगभग भरिएको अवस्थामा भेराइजन र यसको प्रतिस्पर्धीहरूले उच्च गतिको ब्रोडब्यान्ड इन्टरनेट व्यवसाय विस्तार गर्न खोजिरहेका छन्। यसै महिना भेराइजनले २० अर्ब डलरमा फाइबर-अप्टिक इन्टरनेट प्रदायक फ्रन्टियर कम्युनिकेशन खरीद गर्ने सम्झौता गर्‍यो।

ब्रोडब्यान्ड नेट ग्राहकहरू ३८९,००० थपिए, जुन एक वर्ष पहिलेको ४३४,००० भन्दा थोरै कम हो, तर कुल ब्रोडब्यान्ड ग्राहकहरू ११.९ मिलियनभन्दा बढी पुगे। भेराइजनले फिक्स्ड वायरलेस सेवामा ३६३,००० ग्राहक थप्दै लगभग ४.२ मिलियन कुल ग्राहक पुर्‍यायो।

कम्पनीको नाफा प्रति शेयर १.१९ डलर रह्यो, जुन विश्लेषकहरूको १.१८ डलरको अनुमानभन्दा थोरै माथि थियो। तर कम्पनीको शुद्ध नाफा ३. ४ अर्ब डलरमा घट्यो जसमा स्वैच्छिक अवकाश कार्यक्रम र कर्मचारी कटौतीको कारण १.७ अर्ब डलरको शुल्क लागेको थियो।