वायरलेस डाटा ट्रान्सफरमा कीर्तिमान: एक सेकेण्डमा ९३८ जीबी ट्रान्सफर, फाईभजीको तुलनामा १० हजार गुणा तीव्र

काठमाडौं ।

वैज्ञानिकहरूले हावामा ९३८ गिगाबिट प्रति सेकेन्ड (जीबीपीएस) गतिको डाटा पठाउन सफल भएका छन् जुन वायरलेस प्रसारणको लागि नयाँ कीर्तिमान हो। यो गति लगभग १ टेराबिट प्रति सेकेन्ड (टीबीपीएस) नजिक छ जसले गर्दा ३० जीबी (गिगाबाइट) को ४के अल्ट्रा एचडी चलचित्र मात्र ०.२६ सेकेन्डमा डाउनलोड गर्न सकिन्छ।

तुलनाका लागि संयुक्त राज्य अमेरिकामा औसत फाइभजी कनेक्शन (१४० देखि २३० मेगाबिट प्रति सेकेन्ड) प्रयोग गर्दा यो डाउनलोड गर्न करिब १७ देखि २९ मिनेट लाग्न सक्छ। यस्तै बेलायतमा औसत फाइभजी गति १०० एमबीपीएस रहेको छ जसले गर्दा नयाँ डाटा प्रसारण गति करिब ९,३८० गुणा छिटो भएको देखिन्छ।

लाइभसाइन्स डटकमका अनुसार वैज्ञानिकहरूले यो उपलब्धि रेडियो र अप्टिकल प्रविधिहरूलाई पहिलो पटक संयोजन गरेर प्राप्त गरेका हुन् जसले १५० गिगाहर्ट्जसम्मको रेडियो फ्रिक्वेन्सीलाई प्रयोग गर्न सम्भव बनायो। तिनीहरूले आफ्नो विधिहरूको व्याख्या १५ अक्टोबरमा द जर्नल अफ लाइटवेभ टेक्नोलोजीको नयाँ संस्करणमा प्रकाशित अध्ययनमा गरेका छन्।

अधिकांश फाइभजी कनेक्शनहरूले ६ गिगाहर्जभन्दा तलका “साँघुरा” फ्रिक्वेन्सीहरूमा डाटा प्रसारण गर्छन्। तर यी प्रसारण ब्यान्डहरू अत्यधिक भीडभाड भएका कारण, स्पीडहरू प्रायः फाइभजी को सैद्धान्तिक अधिकतम गति (२० जीबीपीएस) भन्दा निकै कम हुन्छ।

भविष्यको सिक्सजी प्रसारण गतिको सम्भावना फाइभजीका साँघुरा ब्यान्डहरूभन्दा उच्च फ्रिक्वेन्सीहरूमा आधारित हुनेछ जसले सञ्चार नेटवर्कहरूलाई अझ तीव्र गतिको पहुँच दिन सक्ने अपेक्षा गरिएको छ।

ग्लोबल मोबाइल सप्लायर्स असोसियशन (जीएसए) का अनुसार यी ब्यान्डहरूमा ७ देखि २४ गिगाहर्जसम्मका “अपर मिड-ब्यान्ड” फ्रिक्वेन्सीहरू र ९० देखि३०० गिगाहर्जसम्मका “सब-टेराहर्ट्ज ब्यान्डहरू” समावेश छन्।

बेलायतमा रहेको युनिभर्सिटी कलेज लण्डनका विद्युत् ईन्जिनियरिङका प्राध्यापक र वरिष्ठ अध्ययन लेखक झिक्सिन लिउले भने, “वर्तमान वायरलेस सञ्चार प्रणालीहरू उच्च-गतिको डाटा पहुँचको बढ्दो मागसँग तालमेल गर्न संघर्ष गरिरहेका छन्, विशेष गरी प्रयोगकर्ता र फाइबर अप्टिक नेटवर्कका बीचको अन्तिम केही मिटरको क्षमता हामीलाई पछाडि धकेल्दैछ।”

लिउले थपे, “हाम्रो समाधान भनेको उपलब्ध फ्रिक्वेन्सीहरूलाई बढी उपयोग गरेर ब्यान्डविथ बढाउनु हो, जसले उच्च संकेत गुणस्तर कायम राख्दै विभिन्न फ्रिक्वेन्सी स्रोतहरूको पहुँचमा लचिलोपन प्रदान गर्छ। यसले प्रयोगकर्ता टर्मिनलहरू र इन्टरनेटका बीचको गति अवरोधलाई हटाउँदै अत्यन्त तीव्र र भरपर्दो वायरलेस नेटवर्कहरू बनाउँछ।”

यस नयाँ दृष्टिकोणले दुईवटा विद्यमान वायरलेस प्रविधिहरू उच्च-गतिको इलेक्ट्रोनिक्स र मिलिमिटर वेभ फोटोनिक्सलाई पहिलो पटक संयोजन गरेको छ। लिउका अनुसार पछिल्लो प्रविधिले फोटोनिक्स (वा प्रकाश) प्रयोग गरेर मिलिमिटर-वेभ रेडियो फ्रिक्वेन्सी संकेतहरू उत्पन्न गर्छ। यो हाइब्रिड प्रणालीले भविष्यका सिक्सजीजस्ता प्रणालीहरूमा प्रयोग गर्न सकिने ब्यान्डहरूमा ठूलो मात्रामा डाटा वायरलेस रूपमा प्रसारण गर्न सक्षम बनाउँछ।

वैज्ञानिकहरूले ५ देखि ७५ गिगाहर्ज को दायरामा सञ्चालन हुने इलेक्ट्रोनिक डिजिटल-टु-एनालग सिग्नल जेनेरेटरहरूलाई प्रकाश-आधारित रेडियो सिग्नल जेनेरेटरहरूसँग मिलाएर ७५ देखि १५०गिगाहर्ज सम्मका फ्रिक्वेन्सीमा डाटा प्रसारण गर्न सक्षम बनाए। वैज्ञानिकहरूका अनुसार यो संयोजनबाट कुल १४५ गिगाहर्ज ब्यान्डविथ प्राप्त भयो जुन यसअघि प्राप्त गरिएको वायरलेस प्रसारणको विश्व कीर्तिमानभन्दा पाँच गुणा बढी हो।

यो हाइब्रिड प्रविधि भीडभाड भएका स्थानहरूमा मस्तुल अर्थात अग्ला टावरहरूबाट वायरलेस सिग्नलहरू प्रवर्धन गर्न प्रयोग गर्न सकिन्छ जसका कारण मानिसहरूले आफ्ना स्मार्टफोनहरूबाट फाइभजी (र भविष्यमा सिक्सजी) गतिको फाइदा लिन सक्नेछन्।

यसले ठूलो कन्सर्टहरू जस्ता अत्यधिक जनसंख्या भएको क्षेत्रमा  कुनै नेटवर्क ट्राफिक वा ढिलाइको अनुभवबिना नै धेरै मानिसहरूले एकसाथ वायरलेस नेटवर्क प्रयोग गर्न सक्ने वातावरण तयार गर्ने लाइभसाइन्स डटकमले जनाएको छ।

वैज्ञानिकहरूले हालसम्म आफ्नो प्रणालीलाई प्रयोगशालामा मात्र परीक्षण गरेका छन्, तर भविष्यमा व्यापारिक क्षेत्रहरूमा प्रयोग गर्न मिल्ने प्रोटोटाइप उत्पादन गर्ने योजना बनाएका छन्। यदि सफल भएको खण्डमा उनीहरूले आफ्नो प्रविधिलाई अर्को पाँच वर्षभित्र व्यावसायिक उपकरणमा समावेश गर्ने आशा राखेका जनाइएको छ।