ह्याकरहरूले बिक्रीका लागि प्रस्ताव गरे करोडौं भारतीय प्रयोगकर्ताको लीक डाटा

काठमाडौं ।

छिमेकी देश भारतको स्टार हेल्थ एण्ड एलाइड इन्स्योरेन्स कम्पनीका करोडौं प्रयोगकर्ताको डाटा लीक भएको छ। रिपोर्टका अनुसार करिब ३.१ करोड ग्राहकको व्यक्तिगत जानकारी लीक भएको छ।

यो डाटा लीकमा मोबाइल नम्बर, प्यान कार्ड विवरण, व्यक्तिको ठेगाना र चिकित्सा अवस्था जस्ता संवेदनशील जानकारी समावेश छ।

डाटा लीकको कारण

यस डाटा लीकको पछाडि एक ह्याकरको हात रहेको बताइएको छ, जसले कम्पनीको प्रमुख सूचना सुरक्षा अधिकारी (सिसो) लेनै यो डाटा बेचेको दाबी गरेको छ।

यस घटना पछि, कम्पनीले फरेन्सिक अनुसन्धान सुरु गरेको छ र सरकार र नियामक निकायहरूसँग नजिकबाट काम गरिरहेको छ।

डाटा लीकको जानकारी

लीक भएको जानकारीमा ग्राहकको मोबाइल नम्बर, प्यान कार्ड विवरण, ठेगाना र स्वास्थ्य अवस्था समावेश छ। ह्याकरले यो डाटा टेलिग्राम च्याटबट मार्फत साझा गर्यो र पछि यसलाई एक वेबसाइट Starhealthleak.st मा बिक्रीको लागि उपलब्ध गराएको थियो।

यो डाटा बिक्रीको लागि उपलब्ध गराएपछि ह्याकरले आफ्नो वेबसाइटमा लेखेका छन्, “म स्टार हेल्थ इन्डियाका सबै ग्राहकहरूको डाटा र बीमा दाबीहरू लीक गर्दैछु र यो लीक डाटा स्टार हेल्थ र यससँग सम्बन्धित बीमा कम्पनीहरूले मलाई उपलब्ध गराएको हो। तिनीहरूले यो डाटा सीधै मलाई बेचेका छन्। तपाईंले यी लीक डाटा मैले तल प्रदान गरेको टेलिग्राम बोटमा जाँच गर्न सक्नुहुन्छ।”

ह्याकपछि स्टार हेल्थले एक विज्ञप्ति जारी गर्दै यो लीकबाट आफ्नो सञ्चालनमा कुनै असर नपरेको र यस विषयमा गहन अनुसन्धान भइरहेको बताएको छ। कम्पनीले यो विषय मद्रास उच्च अदालतमा पनि उठाएको छ र अदालतले लीक भएको सूचना हटाउन सम्बन्धित सबै पक्षलाई आदेश दिएको छ।

यो डाटा लीकपछि स्टार हेल्थले आफ्ना ग्राहकहरुलाई कुनै पनि शंकास्पद गतिविधिमा नजर राख्न र आफ्नो व्यक्तिगत जानकारी सुरक्षित राख्न सल्लाह दिएको छ। कम्पनीले यस विषयमा आफूहरु पूर्णरुपमा सहयोग गरिरहेको र छिट्टै यो समस्याको समाधान खोज्ने प्रयास गरिरहेको समेत जनाएको छ ।