एप्पलले आईफोन १६ सिरिज भारतमा एसेम्बल गर्दै, नयाँ एप्पल स्टोर समेत खोल्दै

काठमाडौं ।

अमेरिकी डिभाइस निर्माता एप्पलले गत महिना आईफोन १६ सिरिज लन्च गरेको थियो। यस सिरिजमा आईफोन १६, आईफोन १६ प्लस, आईफोन १६ प्रो र आईफोन १६ प्रो म्याक्स समावेश छन्।

यसबीचमा, एप्पलले आधिकारिक रूपमा भारतमा सम्पूर्ण आईफोन १६ सिरिज एसेम्बल गर्न सुरु गरेको छ।

यसमा दुईओटा प्रो सिरिज आईफोनहरू समावेश रहेका छन् जुन पहिलो पटक एप्पलले चीन बाहिर आफ्नो टप-टियर (शीर्ष-स्तरीय) फ्ल्यागशिपहरू निर्माण गरिरहेको छ। यो कदम एप्पलको चीनबाट टाढा आफ्नो उत्पादन श्रृंखला विविधीकरण गर्ने निरन्तर प्रयासको एक हिस्सा भएको रिपोर्टमा उल्लेख गरिएको छ।

मेड–इन–इन्डिया आईफोन १६ सिरिज फोनहरू यस महिनाको अन्त्यमा भारतमा उपलब्ध हुनुका साथै विश्वभरका केही देशहरूमा निर्यात पनि गरिने छ।

आईफोन १६, आईफोन १६ प्लस र प्रो म्याक्स एप्पलको सम्झौता निर्माता फक्सकनको फ्याक्ट्रीमा निर्माण भइरहेको छ।

आईफोन १६, १६ प्लस र आईफोन १६ प्रो कम्पनीको अर्को सम्झौता निर्माता पेगाट्रोनको कारखानामा निर्माण भइरहेको छ। टाटा इलेक्ट्रोनिक्सलाई आईफोन १६ र आइफोन १६ प्लस निर्माणको जिम्मेवारी दिइएको छ ।

यसबाहेक एप्पलको आईफोन १५, आईफोन १५ प्लस, आईफोन १४, आईफोन १४ प्लस र आईफोन १३ पनि भारतमा उत्पादन भइरहेको छ।

त्यसैगरी एप्पलले बेंगलुरु, पुणे, दिल्ली र मुम्बईमा ४ नयाँ एप्पल स्टोर खोल्ने योजना बनाएको छ। साथै यी नयाँ स्टोरहरू सन् २०२३ को अप्रिलमा खोलिएका दिल्ली र मुम्बईका अवस्थित स्टोरहरुको लाइनमा सामेल हुने रिपोर्टमा भनिएको छ।