शाओमीको सबैभन्दा सस्तो वाईफाई ७ राउटर विश्वव्यापी रूपमा सार्वजनिक

काठमाडौं ।

शाओमीले गत जनवरीमा आफ्नो किफायती वाईफाई ७ राउटरहरू मध्ये एक ‘बीई३६००’ चीनमा लन्च गरेको थियो। ९ महिनाको लामो प्रतिक्षापछि कम्पनीले अन्ततः यस ‘बीई३६००’ राउटरलाई विश्व बजारका लागि सार्वजनिक गरेको छ।

साथै सबै स्पेक्स र फिचर्सहरूको साथ यस राउटरलाई शाओमीको ग्लोबल आधिकारिक साइटमा सूचीबद्ध गरिएको जनाइएको छ।

शाओमी बीई३६०० राउटरको स्पेसिफिकेसनहरू

राउटरले ३५७०एमबीपीएसको डुअल–ब्यान्ड वायरलेस दर प्रदान गर्दछ। साथै यो थ्रुपुटमा वाईफाई ६ को तुलनामा ४४ प्रतिशत बृद्धि भएको जनाइएको छ जसले २×२ १६० मेगाहर्ज समर्थन गर्ने फाइभजी फ्रिक्वेन्सी ब्यान्डको आंशिक प्रयोगबाट प्राप्त भएको उल्लेख गरिएको छ।

यद्यपि अन्य सस्तो राउटरहरू जस्तै शाओमी बीई३६०० मा एक सीमातता रहेको छ। यसले २.४जी र फाइभजी फ्रिक्वेन्सी ब्यान्डहरू मात्र प्रयोग गर्ने भएकाले ६गीगाहर्ज ब्यान्ड समर्थन भने प्राप्त नगरिने थप उल्लेख गरिएको छ। त्यसैले डाटा प्रसारण दर पनि तदनुसार सीमित हुने जनाइएको छ।

त्यसैगरी ५ गीगाहर्ज ब्यान्डमा २,८८२ एमबिट प्रति सेकेन्ड अधिकतम प्राप्त गर्न सकिने शाओमीले दावी गर्दा २.४ गीगाहर्ज ब्यान्ड भने मात्र ६८८ एमबिट प्रति सेकेन्डमा सीमित रहेको जनाइएको छ।

क्वालकम ४–कोर १.१ गीगाहर्ज प्रोसेसरद्वारा यो राउटर सञ्चालित रहेको जनाइएको छ जसले १०१२० डीएमआईपीएसको कम्प्युटिङ पावर प्रदान गर्छ।

यसले राउटरलाई एकै पटकमा १२८ वटा डिभाइसहरू अनलाइनलाई समर्थन गर्न सक्षम बनाउँदै धेरै इन्टरनेट–इनेबल्ड डिभाइसहरू भएका वातावरणका लागि उपयुक्त बनाएको उल्लेख छ।

कनेक्टिभिटी तर्फशाओमी वाईफाई ७ राउटरमा एउटा २.५जी नेटवर्क पोर्ट र तीनवटा गिगाबिट नेटवर्क पोर्टहरू रहेका छन् जसले पूर्ण २०००एम ब्रोडब्यान्डलाई समर्थन गर्ने जनाइएको छ।

साथै यस राउटरले डुअल ब्रोडब्यान्ड एक्सेस र डुअल एलएएन (ल्यान) एग्रीगेसन पनि प्रदान गर्ने थप उल्लेख गरिएको छ।

यसबाहेक राउटरमा आईपीटीभी र विभिन्न प्रयोगकर्ता आवश्यकताहरूको लागि इस्पोर्ट नेटवर्कहरूको लागि कस्टमाइजेबल (अनुकूलन योग्य) पोर्टहरू रहेको जनाइएको छ।

मूल्य र उपलब्धता

शाओमीले बीई३६०० वाईफाई ७ राउटरको विश्वव्यापी मूल्यबारे भने अझै खुलाएको छैन। यद्यपि कम्पनीले आगामी दिनहरूमा विशिष्ट बजारहरूको लागि मूल्य निर्धारण विवरणहरू साझा गर्न सक्ने गीज्मोचाइनाले उल्लेख गरेको छ।