सर्चमा ‘एआई’को फिचर यी नयाँ देशहरुमा पनि उपलब्ध गराउँदै गुगल

काठमाडौं ।

गुगलको मूल कम्पनी अल्फाबेटले आफ्नो सर्च इन्जिनमा एकीकृत गरेको एआई फिचर अब विश्वका थप ६ देशमा पनि उपलब्ध गराउने भएको छ।

सर्चमा एआई फिचर उपलब्ध हुने नयाँ देशहरुमा ब्राजिल, भारत, इन्डोनेसिया, जापान, मेक्सिको तथा बेलायत रहेका समाचारमा जनाइएको छ।

कम्पनीले बिहीबार यसबारे जानकारी सार्वजनिक गरेको हो। कम्पनीले केही समयअघि अनावरण गरेको यो फिचरभित्रका केही दक्षताहरु २ महिनापछि हटाएको थियो।

सर्च जायन्टक रुपमा परिचित गुगलले हालै सार्वजनिक गरेको विशेषतामा सर्च रिजल्टको पेज वेबपेजको परम्परागत लिंकभन्दा माथि देखा पर्छ।

अन्तर्राष्ट्रिय समाचार संस्था रोयटर्सका अनुसार यो फिचर कम्पनीले अमेरिकी प्रयोगकर्ताका लागि गत मे महिनामा उपलब्ध गराएको थियो। यसअघि उसले १ वर्षसम्म केही सीमित व्यक्तिहरुमा यसको परीक्षण गरेको थियो।

सार्वजनिक भएको केही समयपछि तथ्यगत रुपमा गलत उत्तर दिएको स्क्रीनशटसहित इन्टरनेटमा मानिसहरुले यो फिचरको व्यापक आलोचना गरेका थिए। उक्त सर्चको गल्तीहरुमा पिज्जाको रेसिपी सोध्दा यसको सामग्रीमा ग्लू राखिएकव तथा अमेरिकी पूर्वराष्ट्रपति बाराक ओबामालाई इश्लाम भनेको लगायतका थिए।

गुगलले यस प्रकारको अनौठो र गलत प्रकारका नतिजा दिएको पक्का गरेपछि गत मे महिनामा अपडेटमार्फत् यसलाई सच्याउने भन्दै ब्लगमा सार्वजनिक आश्वासन दिएको थियो।

यो अपडेटपछि कुन कुन प्रश्नको उत्तरमात्र एआईले देखाउने भन्ने पक्का गरिएको थियो भने रेडिटलगायतका साइटमा प्रयोगकर्ताले राखेका सामग्रीलाई स्रोतका रुपमा लिन छोडिएको थियो।