के एआईले खोस्दैछ मानिसको जागिर? सिस्कोले पनि हजारौं कर्मचारी हटाउँदै

काठमाडौं ।

अमेरिकी प्रविधि कम्पनी सिस्कोले विश्वभरबाट आफ्ना ७ प्रतिशत कामदार हटाउने निर्णय गरेको छ। कम्पनीले यो वर्ष कामदार हटाउन लागेको यो दोस्रो पटक हो।

यो घोषणा कम्पनीको वार्षिक नतिजासँगै आएको हो जसको आम्दानी ६ प्रतिशतले घटेर ५३.८ बिलियन अमेरिकी डलर र खुद आम्दानी १८ प्रतिशतले घटेर १०.३ बिलियन अमेरिकी डलरमा आइपुगेको छ।

यसअघि पनि कम्पनीले ठूलो मात्रामा कामदार हटाइसकेको छ। अन्तर्राष्ट्रिय समाचार संस्था एपीन्युजका अनुसार कम्पनीले अब साइबर सुरक्षा तथा आर्टिफिसियल इन्टेलिजेन्समा केन्द्रित हुनका लागि यसो गरेको हो।

अमेरिकाको क्यालिफोर्निया राज्यको सान होजेमा अवस्थित यो कार्यालयले ७ प्रतिशत कामदार हटाउने भने पनि कति सङ्ख्यामा हटाउने भन्ने खुलाएको छैन।

कम्पनीमा सन् २०२३ को जुलाईसम्म ८४ हजार ९ सय कामदार रहेकोमा त्यसैको ७ प्रतिशत हिसाब गर्ने हो भने कम्पनीबाट कमसेकम ५ हजार ९ सय जनाले जागिर गुमाउने पक्का छ। गत फेब्रुअरीमा भने कम्पनीले ४ हजार कामदार हटाउने बताएको थियो।

विशेषगरी नेटवर्किङ उपकरण बनाउने यो कम्पनीले गत जुनमा भरपर्दा एआई प्रडक्ट डेभलप गर्नका लागि कोहियर, मिस्ट्रल तथा स्केलजस्ता प्रविधि स्टार्टअप कम्पनीहरुमा १ अर्ब डलर लगानी गर्ने घोषणा गरेको थियो।

यसबाहेक कम्पनीले हालै एआई सिस्टमको संरचना डेभलप गर्न चिप कम्पनी एनभिडियासँग सहकार्य गर्ने बताएको छ।

सिस्कोको यो निर्णय आउनुभन्दा २ हप्ताअघि चिप निर्माता कम्पनी इन्टेल कर्पले आफ्ना चिर प्रतिद्वन्द्वी एनभिडिया तथा एएमडीसँग प्रतिस्पर्धा गर्नका लागि भन्दै १५ हजार कामदार कटौती गर्ने घोषणा गरेको थियो।

कम्पनीको उक्त घोषणापछि आएको चौमासिक आम्दानी विवरणबाट लगानीकर्ता निकै निराश भएका थिए भने सेयरमूल्यमा पनि निकै गिरावट आएको थियो।