Technology Khabar २३ श्रावण २०८१, बुधबार
काठमाडौं ।
स्वीस सरकार विकास सहयोग एसडीसीको सहयोगमा बीड म्यानेज्मेन्ट र ट्यान्जेन्ट वेभ्सको सहकार्यमा आज एग्री- डिजी-टेक च्यालेन्ज परियोजनाको घोषणा गरिएको छ।
नेपालको कृषि क्षेत्रमा डिजिटल नवप्रवर्तनको समुन्नतिका निम्ति केन्द्रित यो परियोजना एक वर्षको अवधिभर सन्चालन हुने जानकारी दिईएको छ।
यस परियोजनाले कृषि उत्पादन, दक्षता तथा दिगोपनको प्रवर्धनका लागि डिजिटल प्रविधिका मार्फत कृषिप्राविधिक नवव्यवसाय साना तथा मझौला व्यवसाय तथा ठूला व्यवसायलाई पहिचान एवम् सहयोग गर्ने ध्येय राखेको छ। यस परियोजनाले सहकार्य तथा मार्गदर्शनको मञ्च प्रदान गरि डिजिटल उपायको बिकासका साथै नेपालमा कृषिक्षेत्रको प्रवर्धन गर्नेछ।
यस सन्दर्भमा ट्यान्जेन्ट वेभ्सका संस्थापक सुमन शाक्य भन्छन्, “नेपालको कृषिक्षेत्रको रुपान्तरणका निम्ति डिजिटल नवप्रवर्तनको भूमिका महत्वपूर्ण छ। कृषक तथा कृषि क्षेत्रका समस्या हल गर्न उद्यमीहरुको सशक्तिकरण गर्ने ‘एग्री डिजी-टेक च्यालेन्ज’ परिवर्तनको उत्प्रेरक हो।”
यस परियोजनाले कृषिक्षेत्रका परामर्शदाता, कृषि बीमा कम्पनिहरु, अन्लाईन बजार, वित्तिय सेवा प्रदायक, भन्डारण तथा यातयात सुविधा प्रदान गर्ने व्यवसाय लगायतका कृषिक्षेत्रका नवप्रवर्तनहरुलाई लक्षित गरेको छ।
यस च्यालेन्जले ५ देखी ८ महिनाको अवधिमा चुनिएका नव-व्यवसाय, साना तथा मझौला व्यवसाय तथा ठूला व्यवसायको विकास तथा सामाजिक प्रभाव सिर्जना गर्नका लागी एक्सिलेरेटरका साथसाथै मेन्टरिङ्ग, प्राविधिक सहयोग, लगानी अवसरद्वारा सहयोग पुर्याउने आयोजकले जनाएको छ।
“यस च्यालेन्जको विजेतालाई स्वीस सरकार विकास सहयोग एसडीसीबाट लगानी प्रदान गरिनेछ” बीड म्यानेजमेन्टका प्रमुख कार्यकारी अधिकृत सुजीव शाक्यले बताए।
प्रकाशित: २३ श्रावण २०८१, बुधबार
