आफ्नो प्लेटफर्मबाट बेचिएका सामानको जिम्मा अमेजन आफैंले लिनुपर्छ -अमेरिकी नियामक

काठमाडौं ।

अमेजनले आफ्ना मार्केटप्लेसमार्फत् बिक्री गरिएका सबै खतरायुक्त सामानको जिम्मा आफैं लिनुपर्ने भएको छ।

अमेरिकी नियामक निकाय यूएस कञ्जुमर प्रडक्ट सेफ्टी कमिशन सीपीएससीले मंगलबार यस्ता सामान तेस्रो पक्षले नै बिक्री गरेको भए पनि अमेजनले जिम्मा लिनुपर्ने निर्णय सुनाएको हो ।

अन्तरराष्ट्रिय सञ्चार संस्था द भर्जले उल्लेख गरे अनुसार सीपीएससीले अमेजनले सर्वसाधारणलाई लगभग ४ लाख फिर्ता गरिएका सामानबारे पर्याप्त मात्रामा जानकारी दिन सकेको छैन।

अमेजनले यस्ता सामान बेच्न छोडेको र ग्राहकहरुलाई सचेत गराउन थालेको भए पनि नियामक संस्थाले अमेजनले अनुमोदित फिर्ता प्रक्रिया अवलम्बन गर्नुपर्ने जनाएको हो।

उक्त प्रक्रिया उपभोक्तालाई त्यस प्रकारका खतरायुक्त सामान प्रयोग गर्न, बाँड्न वा उपहार दिन अथवा बेच्नबाट रोक लगाउन निर्माण गरिएको समाचारमा उल्लेख छ।

सीपीएससीले कुनै पनि कम्पनीलाई कुनै उत्पादन फिर्ताका लागि सहयोग गर्ने क्रममा उपभोक्तालाई मात्र नभई हरेक व्यक्तिलाई यसबारे सचेत गराउने गरेको द भर्जले उल्लेख गरेको छ।

सन् २०१८ देखि २०२१ बीचमा बिक्री गरिएका अमेजनका उत्पादनहरुमा समस्यायुक्त कार्बन मोनोअक्साइड डिटेक्टर, विद्युतीय झट्काको खतरा भएका हेयर ड्रायरहरु ‍तथा बच्चाहरुका प्रज्वलनशील खालका पाइजामाहरु रहेको बताइएको छ।

नियामकको उक्त आदेशसहितको निर्णयमा अमेजनले सम्भावित खतराको गाम्भीर्यतामाथि नजरअन्दाज गरेको आरोप लगाउँदै  प्रभावित उपभोक्तालाई हालै खरिद गरिएका समानलाई ‘रिकल’  भन्ने नाम नदिई त्यसमा रहेको सम्भावित सुरक्षा चुनौतीबारे जानकारी गराएको समाचारमा उल्लेख छ।